«Shatqal» operasııasy

Munyń kınorejısser Leonıd Gaıdaıdyń ataqty «Operasııa «Y»-syna esh qatysy joq. Biraq, ómirge kerek. Shymkenttiń halqy jyl saıyn ósip keledi. Kórshiles aýdandardan eldi mekender de qosyldy. Biraq, jazdyń aptap kúnderinde, áýe aınalyp jerge túsken ystyqta jan qorǵalar saıabaqtar az. Adamdar ystyq kún tabaǵa salyp qýyrǵanda qaladan bezip kete jazdaıdy. Osynyń bárin oı eleginen ótkizgen oblys basshysy Janseıit Túımebaev bos jatqan shatqaldardy saıabaqqa aınaldyrýdy usyndy. Al, ol qalada kóp. Burynǵy qurǵap qalǵan sý arnalarynyń ornynan bólek, tabıǵattyń ózi qıystyrǵan, tabanyna tússeń qysta yq, jazda saıa bolarlyqtaı shatqaldar bas ıe joq, eleýsiz jatqan. Sol úshin «Shatqal» degen baǵdarlama qabyldandy. «Shatqaldardy» jaqsy demalys oryndaryna aınaldyrý máselesine basshylyq jasaý úshin oblys ákimi óziniń orynbasarlaryna pyshaq ústinen bólip berdi. Búginde olar ózara jarysqa túsip te ketti. Qańtardyń alǵashqy aptasynan bastalǵan bul jumystyń jaqsy nyshany áz Naýryz merekesin toılaý kezine deıin jalǵaspaq. Ol úshin shatqal tabany tegistelip, jan-jaǵynan sýaǵarlar jasalady, ortaǵa trotýar salynady. Túrli kóshetter egilip, gúlzarlar iske qosylady. Túngi jaryq tartylady. Qalada qoǵam jáne memleket qaı­ratkeri Asanbaı Asqarov atyndaǵy den­drosaıabaq bar. Aqsaqal shetelge shyq­qanda túrli tropıkalyq kóshetterdi de ákeldirgen eken. Myń túrli daraǵy bar, alýan qustardyń turaqty mekenine aınalǵan dendrosaıabaqqa kirseńiz, hosh ıisten kókirek saraıyńyz ashylyp qoıa beredi. Osy dendrobaq áý basynda qoqys alańy bolǵan eken. Isker basshynyń arqasynda ertegideı mekenge aınaldy. Onyń ústine búginde saıabaq salarlyqtaı qaladan bos jer joq. Sondyqtan qala halqy oblys bas­shy­synyń «Shatqal» baǵdarlama­sy­nan jaqsylyq kútip otyr. Igilikter eń aldymen adamdar úshin jasalýy kerek qoı. Baqtııar TAIJAN, «Egemen Qazaqstan» Ońtústik Qazaqstan oblysy