Maksımovıch: «Astanada» áli jarty jyl qalýym múmkin

«Astana» fýtbol komandasynyń jartylaı qorǵaýshysy Nemanıa Maksımovıch elordada jarty jyl qalýy múmkin ekendigin aıtty. Bul týraly vesti.kz habarlady. Serbııa ulttyq quramasynyń oıynshysy 9 qańtar kúni Ispanııanyń «Valensııa» komandasymen 2021 jyldyń jazyna deıin aldyn ala kelisimshart jasasqan. Al «jarqanattar» Maksımovıchtiń transferi úshin 300 myń eýro tóleýge ázir bolǵan. Alaıda, qazaqstandyq komandamen ortaq kelisimge kele almaǵan syńaıly. Bul óz kezeginde serbtiń jańa komandasyna tek osy jyldyń jazynda ǵana qosylatyndyǵyn bildiredi. «Eger qazirgi jaǵdaıǵa qaraıtyn bolsaq, «Astanada» áli jarty jyl qalatyn sııaqtymyn. Aldaǵy kúnderi Dýbaıda ótip jatqan oqý-jattyǵý jıynyna qosylamyn», – dedi Nemanıa. Alǵashynda ol Dýbaıǵa baratyndardyń qataryna qosylmaǵan. Oqý-jattyǵý jıyny keshe, ıaǵnı 15 qańtarda bastaldy. Munda elordalyqtar eki joldastyq kezdesý ótkizedi. Aıta keteıik, Maksımovıchtiń «Astanamen» kelisimsharty osy jyldyń maýsym aıynda aıaqtalady.