2016 jyly 10 myń salyqtyq tekserý júrgizilgen

2016 jyly baqylaý is-sharalary boıynsha 10 myń salyqtyq tekserý júrgizilgen, bul salyqtardy túgel esepteýge múmkindik beredi. Bul týraly búgin Májiliste ótken úkimet saǵatynda QR Qarjy mınıstri Baqyt Sultanov aıtty. «Budan basqa, kásiporyndardyń jabylý kezindegi tekserýlerin júrgizý barysynda aýtsorsıng tetigi engizildi. Onyń nátıjesinde taratý rásimi jeńildedi, tekserý sany men júrgizý merzimi qysqardy. Sondaı-aq, salyq tóleýshilerge aıyppul qoldanbastan, qatelikterdi derbes joıý múmkindigi berildi», - dedi ol. Mınıstrdiń aıtýynsha, 2016 jyly memlekettik bıýdjetke túsken túsimder jospary asyra oryndalyp, 6 trln 198 mlrd teńgeni quraǵan. «2016 jyly memlekettik bıýdjetke túsken túsimder jospary 108,4%-ti qurady nemese 5 719,7 mlrd teńge josparynda, is júzinde 6 198,1 mlrd teńge túsip, 478,4 mlrd teńge asyra oryndaldy», - dep baıandady Baqyt Sultanov. Respýblıkalyq bıýdjet jospary 370,9 mlrd teńgege, jergilikti bıýdjetter 107,5 mlrd teńgege asyra oryndalǵan. «Túsimder boıynsha boljamdy maqsatqa qol jetkizý bul salyqtyq jáne kedendik ákimshilendirýdi jaqsartý boıynsha qabyldaǵan sharalar nátıjesi. Qajetti baqylaý deńgeıi men mindettemelerdi erikti túrde oryndaý úshin bızneske qolaıly jaǵdaı jasaý arasyndaǵy balansty qamtamasyz etý mańyzdy bolyp tabylady», - dedi mınıstr.