Bishkekte bolǵan ushaq apatyna qatysty boljam aıtyldy

«Bishkek mańynda bolǵan áýe apatyna ekıpaj kináli degen nusqa bar, dedi Qyrǵyzstan vıse-premer-mınıstri Mýhammetqalyı Abýlgazıev Dacha-Sýý aýylynda ótken baspasóz brıfınginde, dep habarlady QazAqparat. «Bul AST jeke kompanııasy. Olar ushaqty jalǵa alǵan. Ol Bishkekke otyn quıý úshin toqtaý qajet bolǵan. 07.17 shamasynda ol bizdiń dıspetcherden qonýǵa ruqsat suraǵan. Mamandar eger 300 m jol kórinetin bolsa qonýǵa ruqsat berýge bolatynyn habarlaǵan. Onyń kórinis aımaǵy 325 metr bolǵan. Sondyqtan oǵan qonýǵa ruqsat berildi. Túnde «Manas» aılaǵyna 11 ushaq qonǵan. Onyń ishinde jolaýshylar jáne júk ushaqtary da bar. Qazir kimniń kináli ekenin aıtý qıyn. Biraq apatqa ekıpaj kináli degen nusqa bar. Tuman bolǵandyqtan, jolaqqa qona almaǵan», - dep habarlady ol. Esterińizge sala ketsek, 16 qańtarda saǵat tańǵy 7.31-de Bishkektiń Dacha-Sýý aýylynda áýejaıǵa jaqyn jerde Gonkongten Túrkııaǵa bet alǵan júk ushaǵy qulady. Avıalaıner «Manas» áýejaıynan maı quıýdy josparlaǵan. Apat sadarynan 32 adam qaza tapqan. Qyrǵyzstan vıse-premer-mınıstri Mýhammetqalyı Abýlgazıevtyń basshylyǵymen arnaıy shtab quryldy. Qyrǵyzstanda aza tutý kúni jarııalanady.