Serbııada qazaqstandyq boksshy qyzdar birinshi oryn aldy

Serbııada ótken bokstan dástúrli Ult kýbogynda Qazaqstannyń qyzdar komandasy jalpy esepte birinshi oryn ıelendi. Qazaq qyzdary 6 altyn, 2 kúmis, 4 qola medal enshiledi, dep habarlady QR Boks federasııasynyń baspasóz qyzmeti. Serbııa halyqaralyq týrnırinde álem chempıony Dına Jolaman (54 keli), Valentına Halzova (69) Lázzat Kúngeıbaeva (+81), Rımma Volosenko (60), Darıǵa Shákimova (75) jáne Farıza Sholtaı (81) jeńimpaz atandy. Aıta keterligi, bul týrnırde bizdiń sportshylarymyz qarsylastarynan aıqyn basym tústi. Tipti, fınaldyq kezdesýde eki Qazaqstan sportshysynyń kezdesken kezderi de boldy. Atap aıtqanda, 54 kelide fınaldyq kezdesýde Jolaman men Tuıaqbaı, al 81 kelige deıin salmaq sanatynda Sholtaı men Mamatqulova altyn medal úshin aıqasty. «Bul týrnır jyl basyndaǵy dástúrli boı jazý sanalady. Qyzdar jaman kórsetkish kórsetken joq. Olar týrnırden týrnırge ótken saıyn jaqsy tájirıbe jınap, ózderiniń daıyndyqtaryn shyńdaı túsedi dep oılaımyn. Serbııa týrnıri osy jylǵy alǵashqy jarys jáne bizderge qalaı jumys isteý qajettigin kórý qajet. Bul negizgi jarystar aldyndaǵy tekserý desek te bolady. 2017 jyly biz qyzdar quramasy úshin mańyzdy 17 halyqaralyq týrnırge jáne Qazaqstan chempıonaty men Vetnamda qazan aıynda ótetin Azııa chempıonatyna qatysamyz», - dedi qyzdar quramasynyń aǵa jattyqtyrýshysy Vadım Prısıajnıýk.