2017 jyly OQO-da 11 myń adam kásibı oqýmen qamtylmaq

OQO-da arnaıy eki jumys toby jumyspen qamtý jáne kásipkerlikti damytýǵa baǵyttalǵan jańadan bekitilgen baǵdarlamany halyqqa túsindirý jumystaryn júrgizdi, dep habarlaıdy OQO ákimdiginiń baspasóz qyzmeti. «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasyn» nasıhattaý baǵytynda qurylǵan toptar Kentaý, Túrkistan, Sozaq, Shardara, Saryaǵash, Maqtaral, Shardara, Qazyǵurt, Báıdibek aýdandary men Shymkent qalasynda bolyp, jańa jobanyń jaı-japsaryn aıtyp berdi. Semınar-májiliste oblys ákiminiń birinshi orynbasary Darhan Amangeldiuly jańa baǵdarlamany mindetti túrde aýyl ákiminen bastap tıisti memlekettik múddeli bólim qyzmetkerlerine deıin jetik meńgerýi tıis ekendigin aıtyp, aldaǵy ýaqytta aýyldyq okrýg ákimderi, baǵdarlamany iske asyrýǵa jaýapty mamandar onyń júzege asyrý tetikteri men zańnama normalaryn qoldaný barysyna testileý júrgizilýi josparlanǵanyn atap ótti. Osyǵan oraı, túsindirme jumystary boıynsha tıisti nátıje shyǵaryp, iske asyrý úshin jaýapty sala jetekshilerine birqatar tapsyrmalar berdi.   «Tehnıkalyq jáne kásiptik bilimmen jáne qysqa merzimdi kásiptik oqýmen qamtamasyz etý», «Buqaralyq kásipkerlikti damytý» jáne «Halyqty jumyspen qamtýǵa járdemdesý jáne eńbek resýrstarynyń utqyrlyǵy arqyly eńbek naryǵyn damytý» syndy úsh baǵyttan turatyn jańa baǵdarlama sheńberinde tek bıylǵy jyldyń ózinde oblysta 11 myńnan astam adamdy kásibı oqytýmen qamtý kózdelýde. Onyń 5 myńǵa jýyǵyn tegin kásibı daıarlaýdan ótkizý josparlanǵan. Odan bólek, baǵdarlama sheńberinde berilip kelgen shaǵyn nesıeniń kólemi 3 mln.teńgeden 16 mln. teńgege deıin ulǵaıǵan. Bul jumystar úshin 2017 jylǵa respýblıkalyq bıýdjetten 13,1 mlrd. teńge bólinip, 64,3 myń adamnyń qatysýy josparlanýda.