Saǵyntaev: Kıno - bul bıznes

Kıno - bul bıznes. Eger fılmnen paıda túspese, kınoındýstrııanyń damýy da ekitalaı. Bul týraly búgin Úkimet otyrysynda Premer-mınıstr Baqytjan Saǵyntaev málimdedi. «Ondaıda sapasyz fılmder kóbeıip ketedi. Ony bir ret kóredi de, umytyp ketedi, aqsha da qumǵa sińgen sýdaı joq bolady. Sondyqtan kınony bıznes retinde damytatyn bolsaq, sapaly fılmderdi, xalyq kóretin fılmderdi túsirgen durys. Sosyn qansha aqshanyń aqtalǵanyn birden anyqtap otyrý qajet. Iá, sapaly fılmderdi túsirý úshin aqshanyń kólemi az bolmaýy tıis. Árıne, ázirshe biz Gollıvýd, ıa bolmasa, Bolıvýdtyń deńgeıinde túsire almaıtyn shyǵarmyz. Sondyqtan kınemotografııany damytý tujyrymdamasy aıasynda otandyq kınoındýstrııany qoldaý sharalaryn qaıta qarap shyqqanymyz jón bolar», - dedi Saǵyntaev. Onyń aıtýynsha, otandyq kınoındýstrııa salasyna bıznesti kóptep tartyp, monoqalalar men shaǵyn qalalarda kınoteatrlardy kóptep ashý qajet. Sonymen qatar, kıno bıznes bolsa, oǵan kásipkerler kóptep kelýi kerek. «Búginde elimizdiń geografııalyq jaǵdaıyn eskersek, burynǵy keńester kezinde sııaqty 7 myń eldi mekenniń árbireýinde kınoteatr ustaý ońaı emes. Degenmen, aýdan ortalyqtary bar. Bir qyzyǵy, Talǵarda nege kınozal joq? Bálkim, bir qoldaý jasap, bıznestiń jergilikti jerge barýyna jaǵdaı jasaý qajet shyǵar. Monoqalalar men shaǵyn qalalarǵa barsa da bolady. Bizde bar bolǵany 29 monoqala jáne 41 shaǵyn qala bar. Aýdan ortalyqtaryn da umytpaý qajet. Jańylmasam, 2012 jylda «Damý» qory arqyly jergilikti jerde kınoteatrlardy ashýǵa jeńildetilgen neseıeler berý týraly usynys bolǵan. Onyń qalaısha iske asqanyn bilmeımin. Degenmen, osy ispetti sharalardy jınaqtasaq, ájeptáýir qoldaý jasaı alamyz. Kórermen qaýym oblys ortalyǵyna barmaı-aq fılmderdi kınoteatrdan kóre alady. Al kınoteatrda kórgen fılmniń áseri múldem ózgeshe bolady. Ony bári jaqsy biledi», - dep atap kórsetti Úkimet basshysy.