Astana men Almaty turǵyndary HQKO júktemelerin baqylaı alady

«Azamattarǵa arnalǵan úkimet» memlekettik korporasııasy Astana men Almaty qalalary halyqqa qyzmet kórsetý ortalyqtarynyń (HQKO) júktemelerin baqylaý múmkindigin júzege asyrdy, dep habarlady QazAqparat. Retteý zaly, qujattandyrý jáne bank kassalary qyzmetteriniń júkteme deńgeıin kórsetetin dınamıkaǵa silteme memlekettik korporasııanyń goscorp.kz resmı saıtynyń basty paraǵynda ornalastyrylǵan. «Azamattarǵa arnalǵan úkimet» memlekettik korporasııasy» kommersııalyq emes» AQ memlekettik qyzmetter ádisnamasy jáne monıtorıngi departamentiniń dırektory Gúljan Asanovanyń aıtýynsha, atalǵan servıs azamattarǵa qolaıly bolý úshin qurylǵan jáne olardyń HQKO-ǵa barýyn aldyn ala josparlaýǵa múmkindik beredi. «Osy dıagramma boıynsha adam meılinshe tez qyzmet alý úshin qaı HQKO-ǵa barý kerektigine baǵa bere alady. Iаǵnı, eger oǵan kóshi-qon salasy boıynsha qyzmet kerek bolmasa, ýaqytsha tirkeý qyzmeti boıynsha qyzmet alýshylar aǵyny kóp HQKO-ǵa barý qajet emes, ol kelýshiler sany az kez kelgen basqa ortalyqqa júgine alady», - dedi ol. Sonymen qatar, Gúljan Asanova ázirge tek Astana jáne Almaty qalalaryndaǵy HQKO-larda júktemeni kórýge bolatynyn, jaqyn arada Qazaqstannyń basqa HQKO-laryna kelýshiler sanyn baqylaý múmkindigi qarastyrylatynyn atap ótti. Aqparat ár saǵat saıyn jańartylatyn bolady.