Májiliste jergilikti ózin-ózi basqarýdy damytýǵa qatysty zań jobasy qaraldy

Memleket basshysy «100 naqty qadam» Ult jospary aıasynda aýdandyq mańyzy bar qala, aýyl, kent jáne aýyldyq okrýg deńgeıinde jergilikti ózin-ózi basqarýdyń derbes bıýdjetin engizýdi tapsyrǵan bolatyn. Búgin Májilistiń jalpy otyrysynda Ulttyq ekonomıka mınıstri Tımýr Súleımenov jergilikti ózin-ózi basqarýdy damytý máselelerine qatysty zań jobasy boıynsha baıandama jasady. Atalǵan zań jobasynda jergilikti ózin-ózi basqarýdyń derbes bıýdjeti men kommýnaldyq menshigin engizý, olardy basqarýdaǵy ókilettikterin keńeıtý kózdelgen. Jergilikti ózin-ózi basqarý bıýdjeti aýdandyq mańyzy bar qala, aýyl, kent, aýyldyq okrýg deńgeıinde 2018 jyldan bastap halyq sany 2000 adamnan astam ákimshilik aýmaqtyq birlikterde, al 2020 jyldan bastap barlyq jerlerde memlekettik bıýdjettiń tórtinshi deńgeıi retinde engiziletin bolady. «Sonymen, 2,5 myńǵa jýyq ákimniń qolyna bir kúnde 110 mlrd teńgeden astam aqsha beriledi desek bolady. Budan bólek, olar kommýnaldyq menshikti basqarý fýnksııasyne ıe bolady. Qashan jáne kim olardy oqytady? Bul jerde basqa sózdi paıdalaný múmkin emes. Eshqandaı trenıngter, aqparattyq toptar, kitapshalar aýyldyq okrýgtiń baıǵus ákimin daıyndaı almaıdy. Ol eshqashan osynsha qarjyny, kommýnaldyq menshikti basqaryp kórgen emes. Oǵan bıýdjettik prosesti, kommýnaldyq menshikti durys jáne saýatty basqarýdy úıretý kerek. Bul óte mańyzdy suraq. Eger ákim zań jobasy boıynsha berilip otyrǵan bul múmkindikti paıdalana almasa, eń jaqsy jaǵdaıda, qarajatty tıimdi ıgermeýge tap bolamyz. Al eń soraqysy, aýyldyq okrýgter men eldi mekenderdiń ákimderi jemqorlyqqa qarsy qyzmettiń áleýetti «klıentterine» aınalýy múmkin. Olardy nege ıtermelep jatqanymyzdy túsinesiz be? Biz ákimderdi daıyndaýymyz qajet. Bıýdjettik qarajatty qalaı baqylaımyz degen suraq týyndaıdy? Bul da zań jobasynda aıqyndalmaǵan», - dedi Májilis tóraǵasy Nurlan Nyǵmatýlın. Bir aıta keterligi, atalmysh zań jobasy aıasynda bıýdjet, salyq jáne azamattyq kodeksterge, «Memlekettik múlik týraly», «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly», «Jarnama týraly» zańdarǵa ózgerister men tolyqtyrýlar engizý josparlanǵan. Májilis tóraǵasy Nurlan Nyǵmatýlın ekinshi oqylymǵa deıin zań jobasyn tyńǵylyqty zerdelep, barlyq olqylyqtardy túzeýdi tapsyrdy.