Shúmenov: Qarsylasym jekpe-jek merzimin uzartqysy keledi

О́tken jyldyń qarasha aıynda WBA shtab-páterinde (Dúnıejúzilik boks qaýymdastyǵy) qazaqstandyq Beıbit Shúmenov (17-2, 11 KO) pen birinshi aýyr salmaqta WBA (Regular) belbeýiniń jáne WBA nusqasy boıynsha ýaqytsha álem chempıony kýbalyq Iýnıer Dortıkostyń (21-0, 20 KO) arasynda jekpe-jek ótkizý týraly saýda júrgizilgen. Bul saýdany kýbalyq sportshynyń  Caribbean Promotions kompanııasy jeńip alǵan. Aıqas 11 aqpan kúni ótkizilýi tıis bolatyn. Alaıda, áli kúnge deıin osy jóninde resmı aqparat jarııalanǵan joq. «О́zderińiz biletindeı saýda júrgizildi. Olardyń erejesi boıynsha jekpe-jek 90 kúnniń ishinde ótkizilýi tıis. Bul isti kýbalyq tarap jeńip alǵannan keıin maǵan 11 aqpanǵa arnalǵan kelisimshart usyndy. Kezdesý Maıamıde uıymdastyrylýy kerek bolǵan. Biraq osydan tórt-bes kún buryn Dortıkostyń ókilderi WBA uıymyna ýaqytyn sozý jóninde ótinish jasapty. Mundaı kezde jospar tek tabıǵı apat nemese órt bolǵan jaǵdaıda ǵana uzartylady. Al esh sebepsiz bul jaǵdaıǵa ruqsat berý esh zańǵa sáıkes kelmeıdi», – dedi Shúmenov. «Kelisimshartqa qol qoıylǵannan keıin daıyndyqty bastap kettim. Sondyqtan zańgerlerim 11 aqpanda jospardyń oryndalýy nemese gonorarymdy tóleýi úshin tıisti sharalar qoldanyp jatyr. Mundaı orynsyz jaǵdaıdan men shyǵynǵa ushyraımyn. Sondaı-aq, qazir mansabym da bir orynda toqtap qaldy», – dedi boksshy. «WBA kýbalyqtardyń suranysyn qanaǵattandyrady dep oılamaımyn. Eger Dortıkosqa qarsy shyqpasam, menedjerim El Heımonmen aqyldasamyn. 28 qańtar kúni Las-Vegasta úlken shoý bolady, múmkin sol kúnge aýystyrar. Buǵan qýana-qýana keliser edim. Sebebi, deńgeıimdi bir qalypta ustap turý da ońaı sharýa emes», – dedi qazaqstandyq bylǵary qolǵap sheberi.