Antarktıdaǵa sapar qorytyndylandy

Ekspedısııa 42 kún boıy ótti. Onda ekspedısııa músheleri Antarktıdanyń saryshunaq sary aıazynda ǵylymı zertteýler júrgizip qaıtty. Bul týraly búgin Ortalyq kommýnıkasııalar qyzmetinde ótken Antarktıdaǵa barǵan «Táýelsizdik polıýsi» ǵylymı-zertteý ekspedısııasynyń qorytyndysy týraly baspasóz máslıhatynda belgili boldy. Ekspedısııaǵa komanda kapıtany Maǵjan Saǵymbaev, sportshylar Iýrıı Iýshın, Ilııas Ǵalymbekov, ǵylymı qyzmetkerler Dáýlet Sháripov, Arman Baımuhamedov pen komandanyń jalǵyz arýy - Álııa Ernazarova qatysty. Olar Antarktıdanyń Vınson shyńyna shyǵyp, Ońtústik polıýske shańǵymen jetti. Brıfıngte ǵylymı sapar týraly "Qazaq geografııalyq qoǵamy" QB tóralqa tóraǵasy Tólegen Tastanbekov baıandady. Ol ekspedısııanyń máni men mańyzy týraly keńinen aıtyp berdi. «Jobanyń barlyq úsh kezeńi sátti ótti. Bizdiń qyz-jigitter Vınson shyńyna shyǵyp, shańǵy ekspedısııasy men ǵylymı zertteýlerdi júrgizip qaıtty. Elimizdiń tarıhynda alǵash ret Táýelsizdik kúni Qazaqstannyń memlekettik týy Antarktıdanyń eń bıik núktesine kóterildi. Ekspedısııaǵa qatysýshylar otandastarymyzǵa eki ret syı jasady. Iаǵnı, olar 16 jeltoqsanda Vınson shyńynan elimizdi Táýelsizdik kúnimen quttyqtap, 31 jeltoqsanda Ońtústik polıýsinen jańa jyl qarsańynda quttyqtaý sózderin joldady. Ekspedısııa kóptegen adamdardyń atsalysýymen júzege asty. Osyǵan oraı, men shyn júrekten Qazaqstan ulttyq geografııalyq qoǵamy QazaqGeography qamqorshylyq keńesiniń tóraǵasy Kárim Másimovke, QazaqGeography basqarma keńesiniń tóraǵasy Qanat Baıǵarınge, QHA tóraǵa orynbasary Eraly Toǵjanovqa, Aqparat jáne kommýnıkasııalar mınıstri Dáýren  Abaevqa, «Báıterek» holdınginiń basqarma tóraǵasy Erbolat  Dosaevqa, «Qazaq Geografııalyq Qoǵamy» QB qamqorshylar keńesiniń tóraǵasy Nurlan Abdýovqa, Nazarbaev Ýnıversıtetiniń prezıdenti  Shıgeo Katsýǵa, ál-Farabı atyndaǵy QazUÝ-niń rektory Ǵalymqaıyr Mutanovqa, D.S. Asfendııarov atyndaǵy QazUMÝ-niń birinshi prorektory Nurgúl Hamzınaǵa, sonymen birge jýrnalıster, blogerler men barsha Qazaqstan halqyna bizge senim artyp, qoldaý kórsetkenderińiz úshin alǵysymdy bildiremin. Shyn júrekten sizderge úlken raqmet!», - dedi ol. Atletter Maǵjan Saǵymbaev, Iýrıı Iýshın, Ilııas Ǵalymbekov men dáriger Dáýlet Sháripov Ońtústik polıýske alǵash ret barǵan qazaqstandyq shańǵy ekspedısııasynyń músheleri bolyp otyr. Olar 11 kúnde 217 shaqyrymdy muzdyń ústimen júrip ótti. Jıynda QazaqGeography Almaty qalasy óńirlik ókildiginiń basshysy, ekspedısııa tobynyń jetekshisi Maǵjan Saǵymbaev ta Antarktıdada alǵan áserlerimen bólisti. «Ekspedısııa kapıtany bolǵanyma qýanyshtymyn.  Bul men úshin úlken qurmet. Sol sebepten bizdiń komandamyzdyń árbir múshesi 100 paıyzǵa jumys istedi. Árıne, jolda qıyn jaǵdaılar da boldy. Degenmen biz qandaı qıyndyq bolsa da onyń bárin jeńe bildik. Bizge qoldaý kórsetip, senim artqan barsha qazaqstandyqtarǵa alǵysymdy bildiremin. Antarktıdada ekspedısııa barysynda jınaǵan baǵa jetpes ómirlik tájirıbe úshin jáne biregeı múmkindik úshin QazGeoge jáne meniń dostaryma alǵysym sheksiz»,- dedi ol. Ekspedısııanyń ǵylymı bólimine bıologııa salasynda jáne Antarktıdanyń tótenshe  jaǵdaıynda adam fızıologııasyna áser beretin derekterdi taldaǵan jas qazaqstandyq ǵalymdardyń zertteýleri endi. Aldaǵy kezde sonyń nátıjesi boıynsha dóńgelek ústel men sheberlik sabaqtar ótkiziledi. Osyǵan baılanysty ekspedısııanyń ǵylymı qyzmetkeri Arman Baımuhamedov jaqyn arada sapardyń qorytyndysy jan-jaqty zerttelip, ǵylymı jumystardyń nátıjesi shyǵatynyn, oǵan mamandar taldaý jasaıtynyn atap ótti. «Antarktıdaǵa jer-júziniń kóptegen ǵalymdary keledi. Ony zerttegisi keletin adamdar óte kóp. Sondyqtan biz ǵylymı-zertteý ekspedısııasynyń múshesi bolǵanymyz úshin qýanyshtymyz. Bizdiń ǵylymı tobymyz adam densaýlyǵy men qorshaǵan ortany qorǵaý salasynda zertteýler júrgizý úshin kóptegen derekter jınady. Iýnıon Gletcher bazasynda bolǵanymyzda sheteldik ǵalymdarmen tanysyp, Antarktıdany zerttegen jetekshi elderdiń zertteý tájirıbelerin qabyldap keldik. Endi sapardyń nátıjesine taldaý jasaıtyn bolamyz», dedi jas ǵalym. Bul otandastarymyzdyń Aq qurlyqqa jasaǵan alǵashqy sapary emes. Alǵash ret QazGeo komandasynyń 15 múshesi Antarktıdaǵa 2011 jyly barǵan bolatyn. Sodan keıin olar Arktıka men Antarktıkada eki ret bolyp qaıtty. Dastan KENJALIN, «Egemen Qazaqstan»