Qazaqstanda eń jıi urlanatyn kólikter anyqtaldy

Elimizde eń jıi urlanatyn kólikterdiń arasynda Lada markaly kólikter kósh bastap tur, - dep habarlaıdy "Nomad Insurance" AQ saqtandyrý kompanııasy. "Lada markaly kólikterdiń kóbisinde qarapaıym dabyl berý júıesi qosylmaǵan, sondaı-aq, ol kólikti júrgizý de ońaı - baılanystyrýshy eki symdy qosý arqyly júre beredi", - dedi kompanııa ókilderi. Sondaı-aq, jıi urlanatyn kólikterdiń tiziminde ekinshi bolyp Toyota (Corolla, Camry, Prado, Toyota Land Cruiser, RAV 4) tursa, 3-orynda - Mazda (626-shy model) kóligi tur. "Kompanııa ókilderi daıyndaǵan málimetteriniń kóbisi QR IIM resmı statıstıkasyndaǵy málimettermen sáıkes keledi. Mysaly, 2015 jyly Qazaqstanda 890 avtokólik urlaý deregi anyqtalsa, 2 919 kólikti aıdap áketý deregi tirkelgen. Al 2014 jyly 771 urlyq pen 3 854 aıdap áketý deregi bolsa, 2013 jyly 875 kólik urlanyp, 4 457 kólikti bireýler aıdap áketken", - dedi saqtandyrý kompanııasynyń ókilderi.