"Astana-Zashıta" poıyzyna "Abaı joly" ataýy berildi

"Astana-Zashıta" baǵytymen qatynaıtyn júrdek poıyzǵa "Abaı joly" ataýy berildi, - dep habarlady "Jolaýshylar tasymaly" AQ baspasóz qyzmeti. Mundaı sheshimge Shyǵys Qazaqstan oblysy Semeı qalasy zııaly qaýymy ókilderiniń usynysy negiz bolǵany aıtylady. "Bıyl Muhtar Áýezovtiń dúnıege kelgenine 120 jyl tolady. Bul - uly jazýshynyń ádebı murasyn nasıhattaýdaǵy naqty qadam. Bizdiń usynysymyzǵa qoldaý bildirgen ulttyq tasymaldaýshy kompanııa basshylyǵyna alǵys aıtamyz", - deıdi Abaıdyń "Jıdebaı-Bórili" memlekettik murajaı-qorynyń dırektory Bolat Júnisbekov. №67/68 "Astana-Zashıta" júrdek jolaýshylar poıyzy otandyq "Tulpar-Talgo" vagondarymen jasaqtalǵan jáne kún saıyn júredi. Joldaǵy ýaqyty - 16 saǵat 30 mınýt. Aıta keteıik, qazirgi kezde respýblıkalyq jáne memlekataralyq baǵyttar boıynsha "Alataý", "Akjaıyk", "Jetisý", "Saraıshyq", "Aqsuńqar" ataýly poıyzdar qatynaıdy.