Álem boıynsha munaı men gaz barlaý 70 jyldyq mınımýmǵa azaıdy

Munaı baǵasynyń tómendeýi álem boıynsha iri munaı kompanııalarynyń shyǵyndaryn azaıtýyna sebep boldy. Nátıjesinde barlaý jumystary toqyrap, 2016 jyly sońǵy 70 jyldaǵy eń tómengi deńgeıge tústi. Bul týraly investing basylymy jazady. Demek, Exxon Mobil, Shell sekildi kompanııalar sarqylǵan ken oryndarynyń ornyn toltyratyn jerlerdi tabýda qıyndyqqa ushyrap, 2020 jylǵa qaraı álemde qara altyn tapshylyǵy beleń  alady degen sóz. Barlanǵan munaı men gaz qory 2016 jyly 6 mlrd barrelden sál asty, dedi norvegııalyq Rystad Energy konsaltıngtik kompanııasynyń aǵa sarapshysy Sona Mlada. Bul turǵyda bıyl naryqta usynystyń kóptigin týdyrǵan Soltústik Amerıkadaǵy taqtatas munaı qory da statıstıkada eskerildi. 2016 jyly iri ken oryndaryndaǵy sońǵy on jylda ashylǵan suıyq kómirsýtek qory 2010 jylǵymen salystyrǵanda 90 paıyzǵa azaıǵan. "2016 jyly munaı ken oryndaryn barlaý jumystarynyń azaıýy qysqamerzimdi kezeńde shıkizat baǵasyna áser etpegenimen, uzaqmerzimdi bolashaqta bul óz áserin tıgizetin bolady", - deıdi aǵa sarapshy. Onyń aıtýynsha, naryqtaǵy tapshylyq shamamen on jyldan keıin naqty kórine bastaıdy. Degenmen, keı kompanııalar osy ýaqytta da jańa ken oryndaryn taba bilgen. Exxon kompanııasy taıaýda Gaıan ken ornynda 100-150 mln barrel munaı qoryn tapsa, norvegııalyq Statoil 80 mln barrel munaı qory bar jańa ken ornyn ashty. Jalpy, 2016 jyly álemdik munaı kompanııalary salaǵa quıatyn ınvestısııasyn 40 mlrd dollarǵa azaıtqan.