HQKO mobıldik toptary oqý oryndaryn aralaıdy

Búginnen bastap azamattarǵa qolaıly bolýy úshin halyqqa qyzmet kórsetý ortalyqtarynyń mobıldik toptary elektrondyq úkimet portaly arqyly azamattardy ýaqytsha tirkeý boıynsha qyzmetterdi kórsetý úshin oqý oryndaryn, bazarlardy jáne saýda ortalyqtaryn aralaıtyn bolady, dep jazady QazAqparat. «Ýaqytsha tirkelip úlgermegen azamattar úshin HQKO-lardyń mobıldik toptary JOO-larda jáne saýda úılerinde qyzmet kórsetetin bolady. Mobıldik toptardyń ınspektorlary barlyq qalaýshylarǵa elektrondyq sıfrlyq qoltańba jazyp, elektrondyq úkimet portalynda ýaqytsha tirkeýge ótinish rásimdeýge kómektesedi. Bundaı sharalar barlyq oblys ortalyqtary men Astana jáne Almaty qalalarynda uıymdastyryldy», - dedi «Azamattarǵa arnalǵan úkimet» memlekettik korporasııasy» KE AQ fılıaly - Memlekettik qyzmetterdi kórsetý dıreksııasynyń dırektory Ásemgúl Baltasheva. Onyń aıtýynsha, Astanada mobıldik toptar «Artem», «Eýrazııa», «Azıa park» saýda úılerine, al  Almatyda «Tıgrohaýd», «Arystan», «Bolashaq» jáne t.b. bazarlarǵa shyǵatyn bolady. Mobıldik toptar barlyǵy 82 núkteni, onyń ishinde JOO-lardy, bazarlardy jáne memlekettik uıymdardy qamtýdy josparlap otyr. Esterińizge sala ketsek, azamattardy ýaqytsha tirkeý qyzmetin elektrondyq úkimet portaly arqyly onlaın júzege asyrýǵa bolady. Qyzmet «Azamattyq, mıgrasııa jáne ımmıgrasııa» taraýynda qoljetimdi.