2016 jyly Qazaqstanda sábı ólimi 11,6%-ǵa, ıaǵnı 2015 jyly 1000 tiri týylǵan 9,6-dan 2016 jyly 8,6-ǵa deıin tómendedi, dep habarlady QR Densaýlyq saqtaý jáne áleýmettik damý mınıstrliginiń baspasóz qyzmeti.
Kóp jaǵdaıda sábı ólimine perınataldyq kezeńniń asqynýy sebep bolady. Sonymen birge, 1 jasqa deıingi balalar damýdyń týabitti aqaýlary, tynys alý jáne qan aınalym organdarynyń syrqattanýy sebepti de qaıtys bolady.
Respýblıkada kún saıyn 1 myńnan astam, jyl saıyn 400 myńnan asa sábı dúnıege keledi. Týý kórsetkishi sońǵy 5 jylda 3%-ǵa ósti. Elimizde sábı ólimin azaıtýǵa baǵyttalǵan sharalardyń nátıjesinde salmaǵy 500 gramm jáne odan asatyn shala týǵan balalar ómir súrýge múmkindik aldy. 5 jylda salmaǵy 1500 grammǵa deıingi sanattaǵy balalardyń tirshilikke qabilettiligi 30%-ǵa ósip, 60%-ǵa jýyq kórsetkishti qurap otyr.
Esterińizge sala keteıik, Densaýlyq saqtaý salasyn damytýdyń 2016-2019 j. arnalǵan «Densaýlyq» memlekettik baǵdarlamasyn júzege asyrý aıasynda Qazaqstanda negizgi áleýmettik máni bar, eldiń demografııalyq ahýalyna aıtarlyqtaı áseri bar 5 negizgi nozologııa (mıokardtyń jiti ınfarkti, mıdaǵy qan aınalymynyń aýyr aýytqýlary (ınsýlt), qaterli isik aýrýlary, synyqtar, júktilik jáne bosandyrý) boıynsha medısınalyq kómek kórsetýdiń biriktirilgen úlgisi kezeń kezeńimen engizilip keledi.
