«Bavarııanyń» eki fýtbolshysy úlken fýtbolmen qosh aıtysady

«Bavarııa» komandasynyń sapynda oınaıtyn qos birdeı álem chempıony Fılıpp Lam men Habı Alonso bıyl mansabyn aıaqtaý týraly josparlap otyr. Bul týraly vesti.kz habarlady. «Bavarııanyń» mektebinen túlep shyǵyp, uzaq jyldar boıy osy ujymda óner kórsetken Fılıpp Lam maýsym aıaqtalǵannan keıin sport dırektory qyzmetin atqarýy múmkin. Munda ol 2002 jyly negizgi komandada alǵashqy debıýttik matchyn ótkizgen. Alaıda, kelesi jyly Býndeslıgadaǵy «Shtýtgartqa» aýysyp, 2005 jyly qaıta oralǵan. О́z mansabynda Lam segiz márte el chempıony atanyp, 7 ret Germanııa Kýbogyn jeńip alǵan. 2013 jyly Chempıondar lıgasynda top jarsa, 2014 jyly ulttyq quramasymen álem chempıony atanǵan. Sonymen qatar, 35 jastaǵy jartylaı qorǵaýshy Habı Alonso da fýtboldan ketý týraly sheshimge keldi. Kásibı deńgeıde ol 1999 jyly «Real Sosedad» klýbynda alǵashqy oıynyn ótkizgen. Budan keıin Anglııanyń «Lıverpýl», Ispanııanyń «Real» ujymdarynda oınaǵan. 18 jyl mansabynda eki márte Chempıondar lıgasyn, bir ret Anglııa Kýbogyn, Ispanııa, Germanııa chempıonattaryn jeńip alsa, Ispanııa quramasymen 2008, 2012 jyldary Eýropa chempıony jáne 2010 jyly álem chempıony atanǵan.