Kásipkerlerge qatysty 9 myń sanıtarlyq talap qysqartyldy

"Atameken" ulttyq kásipkerler palatasy qoǵamdyq monıtorıng jáne ákimshilik kedergilermen jumys departamentiniń dırektory Erbol О́stemirovtiń aıtýynsha, eki aılyq revızııa barysynda 40-tan astam sanıtarlyq ereje tekserildi. Onda 11 543 talap bar. Revızııanyń nátıjesinde, tekseris qaǵazdarynan ol talaptardyń 80 paıyzyn, ıaǵnı 9 172-sin alyp tastaý týraly sheshim shyǵaryldy. Osylaısha, tekseris qaǵazdarynda 2 371 talap qaldy. Bul týraly kásipkerler quqyǵyn qorǵaý jáne sybaılas jemqorlyqqa qarsy is-qımyl keńesiniń búgingi otyrysynda belgili boldy. "Máselen, tamaq ónimderiniń kóterme jáne bólshek saýdasymen aınalysatyn oryndarǵa qatysty 207 sanıtarlyq talap bolǵan. Sonyń 158-in, ıaǵnı 76 paıyzyn alyp tastaýǵa usynys berildi. Atap aıtqanda, balyq jáne balyq ónimderin saqtaý úshin bólek muzdatqyshty ornatý sııaqty talaptardy alyp tastap otyrmyz. Sosyn óndiristik bólmeler men ydys-aıaqtardyń dezınfeksııasyn baqylaýǵa ishki tekseristiń ózi jetip jatyr. Al syrttan kelgen tekserýshi ydystardan qaýipti bir mıkroflorany anyqtasa, tıisti sharany qoldana alady. Budan bólek, janýarlardan alynatyn shıkizattan jasalǵan ónimderdi veterınarlyq kýáliksiz satýǵa bolmaıdy degen talapty alyp tastady. Sebebi daıyn ónimge ondaı qujat qajet emes", - dedi О́stemirov.