Senim gramotalaryn qabyldady

Keshe Aqordada Elbasy Nursultan Nazarbaev Polsha Respýblıkasynyń, Úndistan Respýblıkasynyń, Aýǵanstan Islam Respýblıkasynyń, Latvııa Respýblıkasynyń Qazaq­stan­daǵy Tótenshe jáne ókiletti elshileri Iаsek Klıýchkovskı, Ashok Kýmar Sharma, Sohrab Alı Safarı, Iýrıs Maklakovstan, sondaı-aq BUU Damý baǵdarlamasynyń Turaqty ókili Stıven Týlldan Senim gramotalaryn qabyldady. Gramotalardy qabyldaý rási­minde sóılegen sózinde Prezıdent elshilerdiń jumysyna ta­bys tiledi jáne olardyń eki­jaq­ty qarym-qatynasty tereńdetý isine úles qosaryna senim bildirdi. Biz óz táýelsizdigimizdiń jı­yr­masynshy jylyna aıaq bas­tyq. Bul jyldar bizdiń qoǵa­my­myzǵa jáne barsha qazaq­stan­dyqtarǵa úlken ózgerister men tolymdy tabystar ákeldi. Búgin biz osy zamanǵy, jańarǵan memlekette ómir súrip jatyrmyz, dedi N.Nazarbaev. Elbasy kelesi kezekte elshilerdiń Qazaqstanǵa tarıhı mańyzdy jáne jaýapty kezeńde kelip otyrǵandaryn, aldaǵy jeksenbide prezıdenttik saılaý ótetinin aıtty. Saılaýdy baıqaýǵa bizdiń elge bir myńnan artyq sheteldik baıqaýshy keldi, dedi odan ári Elbasy. Sondaı-aq Senim gramotasyn tapsyrǵan ár­bir elshiniń memleketimen Qazaq­stan arasyndaǵy ekijaqty qa­rym-qatynasqa qysqasha toqta­lyp ótti. Sonyń ishinde Aýǵan­stan Islam Respýblıkasymen yntymaqtastyqty damytý Qa­zaq­stan syrtqy saıasatynyń ba­sym baǵyttarynyń biri ekenin atap kórsetti. Qazaqstan halyq­aralyq qoǵamdastyqtyń Aýǵan­standy qalpyna keltirý jo­lyn­daǵy kúsh-jigerin qoldaıdy. Biz­diń elimizdiń joǵary oqý oryn­darynda aýǵan stýdentterin tegin oqytý úderisi bastaldy, dedi N.Nazarbaev. Úndistan Qazaqstannyń Azııa­daǵy mańyzdy áriptes­teriniń biri bolyp tabylady. Biz eki el ara­syndaǵy yntymaqtastyqty 2009 jyly qabyldanǵan Stra­te­gııa­lyq áriptestik týraly birlesken deklarasııaǵa sáıkes da­my­tý­da­myz. Bizdiń elderimiz – halyq­aralyq arenada, sonyń ishinde óńirlik jáne jalpy Azııa­daǵy turaqtylyq pen qaýipsizdikti saqtaý máselelerinde belsendi áriptester. Bıylǵy sáýirde Úndistan Premer-mınıstri M.Sıngh Qazaqstanǵa resmı saparmen keledi. Bul sapar eki eldiń arasyndaǵy baılanystardy, so­nyń ishinde ekonomıkalyq yn­ty­maqtastyqty tereńdete túsý­ge tyń serpin beredi degen úmit­temiz, dedi Memleket basshysy. Qazaqstannyń Latvııa jáne Polsha respýblıkalarymen ara­daǵy qarym-qatynastary tý­raly aıtqanda da Elbasy jyly lebiz bildirip, ekijaqty yntymaqtas­tyq­tardyń aldaǵy ýaqyttarda da damı beretinine senim artty. Latvııa bizdiń Baltyq jaǵa­laý­yn­daǵy jetekshi áriptesimiz bo­lyp tabylady. Bizdiń elderi­mizdiń arasynda túrli deńgeıdegi turaqty da tabysty únqatysý ornyqqan. Eki eldiń parlamentterinde dostyq toptary bar. Sonymen birge, Polshamen de yntymaqtastyqtyń barlyq baǵyttary boıynsha jaqsy baı­lanystar ornap otyr. О́zekti óńir­lik jáne halyqaralyq túıt­kilder boıynsha júıeli túrde pikir almasýlar bolyp turady, dedi Prezıdent. Qazaqstanda tu­ra­tyn 50 myń polıak etnosy eki eldi jaqyndastyrýdaǵy mańyz­dy faktor bolyp tabylady, olar bizdiń Otanymyzdyń ór­ken­deýine ózderiniń úlesterin qosýda. BUU-men yntymaqtastyq tý­raly aıtqanda, Elbasy Qazaq­stan Ulttar Uıymynyń qury­lym­dyq bólimshelerimen árip­tes­tikke úlken mán beretinin atap ótti. Biz onyń Damý baǵ­dar­lamasy Qazaqstandaǵy áleý­met­tik salanyń damýyna aldaǵy ýa­qytta da qoldaý kórsete beretinine úmit artamyz, dedi Nur­sul­tan Ábishuly. О́z kezeginde jańa elshiler N.Na­zarbaevqa jyly lebizderi men jaqsy tilekteri úshin alǵys­ta­ryn aıtyp, ekijaqty qarym-qa­ty­nastyń damýyna qoldan kelgen úlesterin qosatynyna sendirdi. Jaqsybaı SAMRAT.