Ýnıversıada sharalaryn ótkizýge baılanysty Almatyda birqatar ýchaskelerde jeke kólik qozǵalysyna shekteýler qoıylady. Al qoǵamdyq kólik belgilengen keste boıynsha júredi.
Alaý estafetasy
Jeksenbi kúni, 29 qańtarda Alaý estafetasy myna baǵyttar boıynsha ótedi dep josparlanǵan: Ál-Farabı atyndaǵy QazUÝ – Tımırıazev kóshesi – Manas kóshesi – Abaı dańǵyly – Seıfýllın dańǵyly – Gogol kóshesi – Seıfýllın dańǵyly – Tóle bı kóshesi – Dostyq dańǵyly – Abaı dańǵyly – Baıtursynov kóshesi – Sátbaev kóshesi – Dostyq dańǵyly – Respýblıka alańy. Bul baǵyttar boıynsha kólik qozǵalysy saǵat 10.00-den 14.00-ge deıin shekteletin bolady. Alaý estafetasy kóshelerdiń basym bóligimen ótetindikten avtobýs baǵyttary ózgermeıdi. Avtobýstar Alaý estafetasy ótetin birqatar jerlerde toqtatylady. Osylaısha, joǵaryda atalǵan ýchaskelerde ár baǵyt boıynsha kólikter ortasha 5-10 mınýt qana kidiredi.Ashylý jáne jabylý saltanattary
Ýnıversıada ashylatyn 29 qańtar men oıyndar aıaqtalatyn 8 aqpan kúnderi «Almaty Arena» stadıonyna kórermender men qonaqtardy jetkizýge erekshe mán beriledi. Arnaıy baǵyttar boıynsha birjaqty jolaqysy 100 teńgeni quraıdy:- Ortalyq stadıon – «Almaty Arena»
- Astana alańy (QBTÝ) – «Almaty Arena»
Jarys kúnderinde
Jarystar ótetin kúnderi kórermenderdi sport nysandaryna tasymaldaý úsh núkte arqyly atqarylady: – Ortalyq stadıon; – «Saıahat» avtobeketi; – Almaty-1 temir jol vokzaly. Bulardan ózge, kórermenderdi jarystar ótetin jerlerge burynnan qatynap júrgen 555 avtobýs jetkizetin bolady: 1. Ortalyq stadıonǵa deıin – 17 baǵyt, 282 avtobýs; 2. Shańǵy tramplıni keshenine deıin – 3 baǵyt, 88 avtobýs; 3. «Almaty Arenaǵa» deıin – 4 baǵyt, 55 avtobýs; 4. «Halyq Arenaǵa» deıin – 5 baǵyt, 112 avtobýs; 5. «Medeý» muz aıdynyna deıin – 2 baǵyt, 18 avtobýs. Qajet bolǵanda baǵyttar kúsheıtiledi. Ýnıversıada ákimshiligi aıtyp ótkendeı, oıyndarǵa qatysýshylarǵa (sportshylar, tóreshiler, tehnıkalyq delegattar jáne basqalary) 519 kólik birligi qyzmet kórsetedi. «Biz negizgi jáne balamaly baǵyttardy jasadyq, qozǵalys hronometrajy esepteldi, polısııa kóliginiń erip júrýi josparlanǵan. Basty maqsat – qalalyqtardyń kúndelikti ómirine esh kedergi keltirmeı, Ýnıversıadanyń tıimdi jáne jaıly logıstıkasyn qamtamasyz etý», – dep atap ótti Ýnıversıada ákimshiligi. Qala turǵyndary men qonaqtarynyń nazaryna, kimde-kim Ýnıversıada ótip jatqan kezde jeke kóligin paıdalanǵysy kelse, onda FISU-diń talaptaryna jáne dúnıejúzilik tájirıbege saı túrli sharalar ótip jatqan jerdiń aınalasynda 500 metrlik qaýipsizdik aımaǵynyń baryn este saqtaýlary tıis. Sondyqtan jeke kólik ıeleri saýyq-saýda keshenderi mańyndaǵy turaqtarǵa kólikterin qaldyryp, ári qaraı qoǵamdyq kólikpen sport nysandaryna bara alady.
