Májilis depýtattary bızneske qatysty qosymsha salyqtyq tekserý erejelerin ózgertý qajet deıdi. Bul týraly
palata.kz jazady.
Tómengi palata ókilderi Qazaqstan Úkimetine salyq daýlaryna qatysty, jalpy bekitilgen 3 jyldyq talap qoıý merzimin bekitý týraly usynys jasady. Mundaı depýtattyq saýaldy, búgin, Qazaqstan Respýblıkasy Premer-mınıstri Baqytjan Saǵyntaevqa depýtat Merýert Qazbekova joldady.
Atalǵan usynystyń týýyna birden-bir sebep bolǵan jaǵdaı – «salyq máselelerine arnalǵan Úkimet saǵaty barysynda UEM basshylyǵymen arada oryn alǵan pikirtalas» (otyrys bıylǵy jyldyń 16 qańtarynda ótti – avt.), dep toqtaldy májilismen. Depýtat, óz kezeginde, Salyq kodeksiniń 46 babyna sáıkes, salyqqa qatysty talap qoıý merzimi 5 jyldy quraıtynyn atap ótti. «Salyq organdary úzdiksiz júrgizip otyratyn tekseristerden keıin de, kásipker ózin jaıly sezine almaıdy. Sebebi, osydan 5 jyl buryn birneshe ret maquldanǵan esebinde nemese 5 jyl buryn kelisimshart jasasqan, burynǵy seriktesine qatysty qandaı da bir zańbuzýshylyq oryn almasyna kim kepil? Al, kásipker osynyń saldarynan taǵy da qosymsha salyqpen qatar, 5 jyl boıy aıyppul men ósimaqy tóleýge májbúr bolmaq», – dep atap ótti plenarlyq otyrysta Merýert Qazbekova.
Depýtat, sonymen qatar, salyqqa qatysty talap qoıý merzimi «osy qalpynda» saqtalatyn bolsa, «máseleniń oryn alýyna deıingi aıyppuldar men ósimaqy somasy, osyǵan deıingi tólengen salyq somasyna teń bolatynyn, sol kezde tipti, «salyqty eki ese emes, úsh esege tóleýge» týra keletinin» tilge tıek etti.
«Bul bızneske qazynalyq turǵydan qysym jasap, keı jaǵdaıda, tipti, kásiporynnyń jabylyp, azamattardyń jumyssyz qalýyna ákep soqtyrady», – dep óz pikirimen bólisti Parlament múshesi.
Budan bólek, depýtattyq saýal avtory, salyq zańdaryna da basa nazar aýdardy. Ol óz kezeginde, «otandyq kásipkerlerdiń Eýrazııalyq ekonomıkalyq odaq kólemindegi básekelesterine, salyqqa qatysty talap qoıý merzimi jeńildetilgenin» aıtty.
«Máselen, Reseı Federasııasy Salyq kodeksiniń 113 babyna sáıkes, salyqqa qatysty talap qoıý merzimi 3 jyldy quraıdy jáne bul zańmen bekitilgen ereje. Al, keı jaǵdaıda, kásipkerdiń qalaýymen, mysaly, QQS qaıtarǵan kezde, 5 jyldyq merzim de qoldanylady. Osy arqyly Reseı Federasııasy kásipkerlerine, Qazaqstandaǵy áriptesterine qaraǵanda, áldeqaıda qolaıly jaǵdaılar jasalǵan», – dep toqtalyp ótti Merýert Qazbekova.
Depýtat, sondaı-aq, Úkimet saǵaty barysynda, «Qarjy mınıstrliginiń salyq daýlaryna qatysty talap qoıý merzimin 5 jyldan 3 jylǵa qysqartýdan bas tartýy, otandyq bıznes-qoǵamdastyq tarapynan túsinispeýshilik týdyryp otyrǵanyn» málimdedi.
Sonymen qatar, depýtat, salyq daýlaryna qatysty 3 jyldyq talap qoıý merzimin bekitýge jóninde taǵy bir usynysyn ortaǵa saldy. «Al, salyq tóleýshiniń ózi, mysaly, QQS qaıtarǵan ýaqytta uzaq merzimge teksertý júrgizý týraly ótinish bildirgen jaǵdaıda, olarǵa ondaı quqyq berýge bolady. Biraq ol mindetti túrde, salyq organdary tarapynan emes, kásipker tarapynan usynylýy tıis», – dep qorytyndylady depýtat.
