Oralda 300 beınekamera ornatylady

Jýyrda Oral qalasynda 300 beınekamera ornatý kózdelýde. Bul týraly Batys Qazaqstan oblysynyń ákimi Altaı Kólginovtiń tóraǵalyq etýimen «Smart City» jobasy aıasynda oblys ortalyǵynda beınebaqylaý qondyrǵylaryn ornatý máselesi talqylanǵan jıynda aıtyldy, dep habarlaıdy QazAqparat. Onda azamattardyń qaýipsizdigin qamtamasyz etý, olardyń quqyǵy men múddesin qorǵaý, kóshe tynyshtyǵy men jol qozǵalysy erejesin saqtaý maqsatynda beınekamera ornatýdyń mańyzdylyǵy atalyp ótildi. Buǵan osyǵan deıin Astana qalasynda beıneqondyrǵylar ornatyp, biraz tájirıbe jınaqtaǵan «Sergek» kompanııasynyń aqparattyq, tehnıkalyq áleýeti jetetini sóz boldy. 300 beınekameranyń basym kópshiligin atalmysh kompanııa memlekettik-jekemenshik áriptestik negizinde ornatýǵa daıyn ekendigin jetkizdi. Aıta keteıik, «Sergek» kompanııasy osyndaı beınekameranyń birin ótken jyly qalanyń M.Sholohov kóshesinde ornatyp kórgen bolatyn. Bul baǵyttaǵy jumystar jol-kólik oqıǵalarynyń aldyn alyp, qylmysty ashýǵa, eń bastysy, turǵyndardyń qaýipsizdigin nyǵaıtýǵa múmkindik bermek.