Kadrlyq jumysty jetildirý isi jalǵastyrylýy tıis

Elbasy Nursultan Nazarbaev Joǵary Sot Keńesiniń tóraǵasy Anatolıı Smolındi qabyldady, dep habarlady Prezıdenttiń baspasóz qyzmeti. Kezdesýde A.Smolın Memleket basshysyna Joǵary Sot Keńesiniń 2016 jylǵy jumysynyń nátıjeleri, sondaı-aq, «100 naqty qadam» Ult josparyn iske asyrý barysynda sýdıalardy irikteý isin ońtaılandyrý jóninde málimdedi. Nursultan Nazarbaev Joǵary Sot Keńesiniń jańa ereje men qabyldanǵan zańǵa sáıkes sapaly kadrlardy irikteý baǵytynda júrgizip jatqan jumysynyń erekshe rólin atap ótip, onyń qyzmetine basqa organdardyń aralasýyna jol berilmeıtinin aıtty. – Biz tolyq obektıvtilik bolý jáne aralaspaýshylyq talaby saqtalý úshin alǵash ret avtonomdy Joǵary Sot Keńesin qurdyq. Qazir sýdıalardy jańa erejeler men jańa zańǵa sáıkes iriktep jatyrmyz, – dedi Qazaqstan Prezıdenti. A.Smolın sýdıalardy irikteý tártibi men biliktilik talaptaryn qataı­týdy kózdeıtin Ult josparynyń 17-qada­mynyń oryndalýy týraly baıandady. – Júrgizilgen jumystar qory­tyn­dysy boıynsha sýdıa laýazymyna eleýli kásibı jáne ómirlik tájirıbesi bar tul­ǵalar taǵaıyndalady, – dedi A.Smolın. Sondaı-aq, Joǵary Sot Keńesiniń tór­aǵasy Sýdıalardyń VII sezinde Qazaq­stan Prezıdenti qoıǵan mindetterdi oryndaýǵa qatysty jumystar týraly habarlady. Memleket basshysy kezdesý qory­tyn­­dysy boıynsha sot júıesindegi kadr­­lyq jumysty jetildirý isin jalǵas­tyrýdy tapsyrdy. Sýret Prezıdenttiń baspasóz qyzmetinen alyndy