О́tken kúnderden syr shertetin jazbalarǵa qaraǵanda, Áýlıe ata jerinde alǵash ret mýzeı 1931 jyly Qarahan kesenesiniń qasyndaǵy molaǵa tıip turǵan shaǵyn úıden ashylǵan eken. Talaı kóne jádigerlerdi tórine jınaǵan bul eski úı talaı tarıhty bastan ótkerip, soǵys jyldary esiginiń aldynda bir kúzetshiden basqa qyzmetkeri de bolmapty. Búginde Jambyl oblystyq tarıhı-ólketaný mýzeıiniń óz aldyna záýlim ǵımaraty bar. Jáne ár bólmesi, ár buryshy, ár sóresi kóne jádigerlerge tola bul ǵımaratqa kelýshiler qatary kóp.
«Móp-móldir kózdiń qarasyn, Tarazdan ǵana tabasyń!» dep orta ǵasyr aqyny Fırdoýsı jyrlaǵandaı shynynda kóne qalanyń boıjetkenderi shetinen sulý bolǵanyna kúmánimiz joq. Myna bir bıshi qyzdyń músini H-HII ǵasyrlarda qoladan quıylypty. Bul jádiger 1964 jyldyń 13 tamyzynda ortalyq stadıonnyń mańynan 1,5 metr tereńdikten tabylǵan.
Al kıiz úı pishindes shyraq pen tizerlep otyrǵan kisiniń (H-HIII ǵasyr) músini, úsh aıaqty sham men búıirine Quran aıattary jazylǵan jazýy bar qumyra da sol jyldary ortalyq bazardyń ornynan qazyp alynypty.
Búginde kóne qala ornynda qazba jumystary qolǵa alynǵan. Arheologtar Taraz qalasynyń ár kezeńine jatatyn jádigerler, onyń ishinde altyn, kúmis, mystan jasalǵan áshekeı buıymdar sııaqty qundy jádigerlerdi topyraq astynan arshyp aldy. Tipti birshama jaqsy saqtalǵan ortaǵasyrlyq ydys qoımasy da tabyldy. Bul tabylǵan jádigerlerden kóshpendilerdiń qoltańbasyn taıǵa tańba basqandaı anyqtaýǵa bolady. Aldaǵy ýaqytta bul jumystar jalǵasyn taýyp, kóne shahardyń tirshiliginen syr shertetin dúnıeler kóptep tabylatynyna senim mol.
Oralhan DÁÝIT,
«Egemen Qazaqstan»
