Munaı naryǵy: Aptanyń mańyzdy oqıǵalary

О́tken juma kúni naryqtaǵy munaı baǵasy sál kóterildi. Oǵan sebep eksporttaýshy elderdiń OPEK+ kelisimi boıynsha qysqartylýy tıis kólemniń oıdaǵydaı saqtalýy, dep jazady investing basylymy. О́tken aptanyń sońǵy saýda kúninde London qor bırjasynda naýryzǵa arnalǵan munaı fıýchersi 55,45 dollarǵa deıin qymbattady. Al jalpy apta ishindegi qymbattaý deńgeıi shamamen 0,04 dollardy quraıdy. Sonymen qatar Davosta Saýd Arabııasynyń energetıka mınıstri Halıd ál-Falıhtyń jasaǵan baıandamasy da qara altyn baǵasyna oń áser etti. Ol qazirdiń ózinde álem boıynsha táýligine óndiris kóleminiń 1,5 mln barrelge azaıǵanyn aıtqan bolatyn. Nátıjesinde naryqtaǵy jaǵdaı turaqtala bastady. Degenmen, AQSh-tyń burǵylaý qurylǵylarynyń sany týraly jańartylǵan málimetten keıin baǵa qaıta qubyla bastady. Osy aptada munaı baǵasyna áser etýshi negizgi faktorlar AQSh-tan jetetin málimetterge baılanysty bolmaq. Seısenbi kúni Halyqaralyq energetıka agenttigi AQSh munaıynyń eksport kólemin jarııalaıdy. Al sársenbi kúni AQSh Energetıka mınıstrligi eldegi munaı men janarmaı kólemi týraly jańalyqpen bólisedi. Beısenbi kúni AQSh tabıǵı gaz qorynyń kólemi belgili bolsa, jumada Baker Hughes kompanııasy AQSh-ta jumys istep turǵan burǵylaý qurylǵylarynyń sanyn jarııalaıdy.