Nazarbaev BUU Bas hatshysynyń Sırııa boıynsha arnaýly elshisimen kezdesti

Nursultan Nazarbaev BUU Bas hatshysynyń Sırııa boıynsha arnaýly elshisi Staffan de Mıstýramen kezdesti. Bul týraly Aqordanyń baspasóz qyzmeti habarlady. Kezdesý barysynda taraptar Sırııadaǵy qaqtyǵysty retteý jónindegi aldaǵy kelissózder máselesin talqylady. Memleket basshysy Astananyń kelissózder ótkizýge daıyn ekenin aıtyp, barlyq qatysýshylar úshin jaǵdaı jasalǵanyn atap ótti. «Men Reseı, Túrkııa jáne Iran Prezıdentteriniń Astanada kelissózder ótkizý jónindegi usynysyn qabyl aldym. Biz kezdesýdiń jemisti ótkenin qalaımyz. Qazaqstan kezdesýge qatysatyn taraptardyń bárimen teń ári senimdi qarym-qatynasta bolǵandyqtan, kelissózder qalypty ótý úshin barlyq jaǵdaı jasalady dep oılaımyn», - dedi Qazaqstan Prezıdenti. Nursultan Nazarbaev Sırııa máselesi búginde Taıaý Shyǵysty ǵana emes, búkil álemdik qaýymdastyqty alańdatyp otyrǵanyn atap ótti. «Taraptar da bolyp jatqan oqıǵalarǵa biz sııaqty alańdaýshylyqpen qarap otyr dep úmittenemin. Sarapshylardyń aıtýynsha, qaqtyǵys bastalǵaly 300 myńnan astam adam qaza tapqan. Osynyń bári bizdi bul máseleni beıbit jolmen ǵana sheshýge úmittenýge jeteleıdi», - dedi Memleket basshysy. Qazaqstan Prezıdenti BUU-nyń arnaýly elshisine Astanadaǵy kezdesý Jenevadaǵy beıbit kelissózderge daıyndyq barysyna eleýli yqpal etetinin aıtty. Staffan de Mıstýra Nursultan Nazarbaevqa Astanada kelissózder ótkizýge múmkindik bergeni úshin BUU Bas hatshysy Antonıý Gýtterıshtiń atynan alǵys bildirdi. «Sizdiń elińiz halyqaralyq arenadaǵy eń kúrdeli túıtkilderdi retteý isinde zor tájirıbesin kórsetip, úlgi bolyp keledi. Qazaqstannyń Birikken Ulttar Uıymy Qaýipsizdik Keńesine turaqty emes músheligi Sırııa qaqtyǵysyn sheshýdegi qosymsha múmkindik bolyp sanalady», - dedi Staffan de Mıstýra. Kezdesý qorytyndysy boıynsha taraptar qarýly qaqtyǵysty odan ári retteý sharalary jóninde pikir almasty.