Qatty qaldyqtar qaıta óńdeledi

Qostanaıda jerdi, aýany taza ustaýdy maqsat tutqan «jasyl mindettiń» qolǵa alynǵany kópshilikti qýantyp otyr. Oblys ortalyǵyndaǵy «MART» saýda-kóńil kóterý ortalyǵyna ornalasqan «Tehnodom» saýda úıine qyzǵylt sary tústi úsh konteıner-jáshik qoıyldy. Oǵan turǵyndar isten shyqqan batareıalar men eskirgen elektr quraldardy, jabdyqtardy ákelip tastaıdy. – Elimizde «Qazaqstan Res­pýb­lıkasynyń keıbir zańna­malyq aktilerine «jasyl ekonomıkaǵa» kóshýi má­seleleri boıynsha ózgerister men tolyqtyrýlar engizý týraly» Zań qabyldanǵan bolatyn. Bul zań shirimeıtin qatty qaldyqtardy basqarý, aýanyń lastanýyn, qorshaǵan ortany jaqsartatyn jáne ómirdiń ekologııalyq sapasyn arttyratyn ınstıtýttyq tetikke kóshý sharalary sekildi kóptegen jumystardy qamtıdy. Osyǵan sáıkes, bar óńirde qatty qaldyqtardy arnaıy jınaý jumystary bastalyp ketti. Isten shyqqan elektrlik quraldar men túrli batareıalardy jınaý aksııasyn uıymdastyrý týraly Energetıka mınıstrliginiń bas­tamasyn qoldaǵan «Tehnodom» iri saýda ortalyǵy «Tabıǵatty súıemiz, Qazaqstandy súıemiz!» jobasymen iske kiristi. Olar elimizdegi Almaty men Asta­nadan bastap, 26 qalada 126 konteıner qoıǵan edi. Mine, jaqsy is Qostanaıǵa da jetti, – deıdi oblystyq ekologııa depar­tamentiniń memlekettik ekolo­gııalyq ınspektory Ser­geı Muqashev. «Tehnodom» saýda ortalyǵy qyzmetkerleriniń aıtýynsha, konteınerler isten shyqqan batareıalar men eski elektr quraldaryna tolǵannan keıin, olardy qaıta óńdeý úshin zaýyt­tarǵa jiberedi. О́kinishke qaraı, Qostanaıda áli mundaı qal­dyqtardy óńdeıtin zaýyt joq. – Turǵyndar qazir saýatty, elektr batareıalarynyń tabıǵatqa qaýipti ekenin túsinýi tıis. Onda asa ýly hımııalyq elementter, synap, aýyr metaldar bar. Bir batareıa 20 sharshy metr topyraqty ýlaıdy, – deıdi Sergeı Muqashev. Sońǵy kezderde Qostanaı kóshelerindegi, shaǵyn aýdan­dardaǵy qatty qaldyq tas­taıtyn oryndarda polıetılen qutylarǵa, qoldanystan shyqqan lampalarǵa, shyny­larǵa arnalǵan konteınerler paıda boldy. Munyń barlyǵy «jasyl ekonomıkaǵa» ǵana emes, «jasyl álemge» bastaıtyn jol bolyp tabylady. Názıra JÁRIMBETOVA, «Egemen Qazaqstan» QOSTANAI