Qazaqstan Respýblıkasy Densaýlyq saqtaý mınıstrliginiń buıryǵy №986

2010 jylǵy 20 jeltoqsan, Astana qalasy Mamandandyrylǵan jáne joǵary mamandandyrylǵan medısınalyq kómek kórsetý erejesin bekitý týraly «Halyq densaýlyǵy jáne densaýlyq saqtaý júıesi týraly» Qazaqstan Respýblıkasynyń 2009 jylǵy 18 qyrkúıektegi kodeksin iske asyrý maqsatynda buıyramyn: 1. Qosa berilip otyrǵan Mamandandyrylǵan jáne joǵary mamandandyrylǵan medısınalyq kómek kórsetý erejesi bekitilsin. 2. «Mamandandyrylǵan jáne joǵary mamandandyrylǵan medısınalyq kómek kórsetý erejesin bekitý týraly» Qazaqstan Respýblıkasy Densaýlyq saqtaý mınıstriniń 2009 jylǵy 30 jeltoqsandaǵy №881 (Normatıvtik quqyqtyq aktilerdi memlekettik tirkeý tiziliminde №6025 bolyp tirkelgen, Qazaqstan Respýblıkasy ortalyq atqarýshy jáne ózge de ortalyq memlekettik organdardyń 2010 jyly №10 aktiler jınaǵynda jarııalanǵan) buıryǵynyń kúshi joıyldy dep tanylsyn. 3. Qazaqstan Respýblıkasy Densaýlyq saqtaý mınıstrliginiń Medısınalyq kómekti uıymdastyrý departamenti (A.Ǵ.Tóleǵalıeva) osy buıryqty zańnamada belgilengen tártippen Qazaqstan Respýblıkasy Ádilet mınıstrliginde memlekettik tirkeýden ótkizýdi qamtamasyz etsin. 4. Qazaqstan Respýblıkasy Ákimshilik-quqyqtyq jumys departamenti (F.B.Bısmıldın) osy buıryqtyń Qazaqstan Respýblıkasy Ádilet mınıstrliginde memlekettik tirkeýden ótkennen keıin buqaralyq aqparat quraldarynda resmı jarııalanýyn qamtamasyz etsin. 5. Osy buıryqtyń oryndalýyn baqylaý Qazaqstan Respýblıkasynyń Densaýlyq saqtaý vıse-mınıstri E.Á. Baıjúnisovke júktelsin. 6. Osy buıryq ony alǵashqy resmı jarııalaǵan kúninen keıin kúntizbelik on kún ótken soń qoldanysqa engiziledi. Mınıstr  S. QAIYRBEKOVA. Qazaqstan Respýblıkasy Densaýlyq saqtaý mınıstriniń 2010 jylǵy 20 jeltoqsan  №986 buıryǵymen bekitilgen Mamandandyrylǵan jáne joǵary mamandandyrylǵan medısınalyq kómek kórsetý erejesi 1. Jalpy erejeler 1. Osy ereje halyqqa mamandandyrylǵan jáne joǵary mamandandyrylǵan medısınalyq kómek kórsetý tártibin, sondaı-aq ony ártúrli kezeńderde júzege asyrýǵa jaýapty organdar men uıymdardyń ózara is-qımylyn aıqyndaıdy. 2. Mamandandyrylǵan jáne joǵary maman­dandyrylǵan medısınalyq kómek kórsetý «M­edı­sınalyq kómektiń túrleri men kólemderin bekitý týraly» Qazaqstan Respýblıkasy Den­saý­lyq saqtaý mınıstriniń mindetin atqarýshynyń 2009 jylǵy 26 qarashadaǵy №796 buıryǵymen (Normatıvtik quqyqtyq aktilerdi memlekettik tirkeý tirkeliminde №5955 tirkelgen) bekitilgen túrler men kólemderge sáıkes júzege asyrylady. 3. Osy erejede mynadaı uǵymdar paıda­lanylady: mamandandyrylǵan medısınalyq kómek – dıagnostıkanyń, emdeý men medısınalyq ońaltýdyń arnaýly ádisterin talap etetin aýrýlar kezinde beıindi mamandar kórsetetin medı­sınalyq kómek; joǵary mamandandyrylǵan medısınalyq kómek (budan ári – JMMK) – dıagnostıkanyń, emdeý men medısınalyq ońaltýdyń eń jańa tehnologııalaryn paıdalanýdy talap etetin aýrýlar kezinde medısınalyq uıymdarda beıindi mamandar kórsetetin medısınalyq kómek. 2. Mamandandyrylǵan medısınalyq kómek kórsetý tártibi 4. Mamandandyrylǵan medısınalyq kómekti beıindi medısınalyq densaýlyq saqtaý uıym­dary konsýltasııalyq-dıagnostıkalyq, stasıo­nar­dy almastyratyn kómek nemese stasıo­nar­lyq medısınalyq kómek nysanynda kórsetedi. 5. Mamandandyrylǵan medısınalyq kómek kórsetýdiń kez-kelgen deńgeıinde dıagnozdy uqsastandyrýdaǵy qıynshylyqtar kezinde, son­daı-aq, naýqas tasymaldanbaıtyn jaǵdaıda qa­jet bolǵan jaǵdaıda respýblıkalyq deńgeı­degi konsýltantty qosa alǵanda, qajetti maman­dar­dy tarta otyryp, konsılıým uıymdastyrylady. 6. Tegin medısınalyq kómektiń kepildik berilgen kólemi men emdeýge jatqyzý jaǵdaı­larynyń josparlanǵan sanynyń sheńberinde pasıenttiń medısınalyq uıymdy erkin tańdaýǵa quqyqtaryn esepke ala otyryp, júzege asyrylady. § 1. Ambýlatorııalyq-emhanalyq deńgeıdegi mamandandyrylǵan medısınalyq kómek 7. Halyqqa ambýlatorııalyq-emhanalyq deń­geı­degi mamandandyrylǵan medısınalyq kómek táýliktik baqylaýsyz dıagnostıka men emdeýdiń arnaıy ádisterin talap etetin aýrýlar kezinde ambýlatorııalyq-emhanalyq uıymdar kórsetedi. 8. Ambýlatorııalyq-emhanalyq deńgeıdegi mamandandyrylǵan medısınalyq kómek sta­sıonardy almastyratyn kómek túrinde kór­setilýi múmkin. 9. Pasıenttiń jergilikti deńgeıdegi medısı­na­lyq uıymda stasıonarlyq emdeýge aıǵaqtary bolǵan jaǵdaıda ambýlatorııalyq-emhanalyq uıym­­nyń dárigeri «Densaýlyq saqtaý salasyn­daǵy ýákiletti organ bekitken tártipte Emdeýge jatqyzý portaly arqyly tegin medısınalyq kómektiń kepildik berilgen kóleminiń sheńberinde stasıonarǵa josparly emdeýge jatqyzýdy uıym­dastyrý jónindegi nusqaýlyqty bekitý týraly» Qazaqstan Respýblıkasy Densaýlyq saqtaý mı­nıstriniń 2010 jylǵy 3 shildedegi №492 buı­ryǵymen (Normatıvtik quqyqtyq aktilerdi memlekettik tirkeý tirkeliminde №6380 tirkelgen) bekitilgen densaýlyq saqtaý salasyn­daǵy ýákiletti organ bekitken tártipte Emdeýge jatqyzý porta­lyn­da (budan ári – Emdeýge jat­qyzý portaly) joldama tirkeledi jáne ony pasıentke beredi. 10. Shuǵyl aıǵaqtary boıynsha emdeýge jat­qyzý qajet bolǵan jaǵdaıda pasıentti jedel medısınalyq járdem qyzmetimen nemese ambý­la­t­orııalyq-emhanalyq uıymnyń sanıtarııalyq avtokóligimen medısına qyzmetkeriniń alyp júrýimen stasıonarǵa jetkiziledi. § 2. Stasıonarlyq deńgeıdegi mamandandyrylǵan medısınalyq kómek 11. Halyqqa stasıonarlyq deńgeıdegi maman­dandyrylǵan medısınalyq kómekti táýliktik baqylaýmen dıagnostıkalaý men emdeýdiń arnaıy ádisterin talap etetin aýrýlar kezinde medısınalyq uıymdar kórsetedi. 12. Halyqqa stasıonarlyq deńgeıde mamandandyrylǵan medısınalyq kómek stasıonarlyq jáne stasıonardy almastyratyn tehnologııa túrinde kórsetiledi. 13. Dıagnostıka men emdeýdiń barlyq ádis­terin qoldanǵan stasıonarlyq kómek kórsetetin medısınalyq uıymdarǵa qatysty pasıentte oń emdeý tıimdiligi bolmaǵan jaǵdaıda bul pasıent mamandandyrylǵan jáne joǵary mamandan­dyrylǵan medısınalyq kómek kórsetetin jergilikti deńgeıdegi basqa medısınalyq uıymǵa sta­sıonarlyq emdeýge jiberiledi. 14. Jergilikti medısınalyq uıymda maman­dan­dyrylǵan jáne joǵary mamandandyrylǵan medısınalyq kómek kórsetý kezinde pasıentte oń emdeý tıimdiligi bolmaǵan jaǵdaıda pasıent mamandandyrylǵan jáne joǵary mamandan­dyrylǵan medısınalyq kómek kórsetetin respýblıkalyq medısınalyq uıymǵa jiberiledi. 15. Pasıentti mamandandyrylǵan jáne joǵary mamandandyrylǵan medısınalyq kómek alý úshin stasıonarǵa emdeýge jatqyzýǵa joldama Emdeýge jatqyzý bıýrosynda tirkeledi. § 3. Joǵary mamandandyrylǵan medısınalyq kómek kórsetý tártibi 16. Stasıonarlyq kómek nysanyndaǵy JMMK jergilikti deńgeıdegideı respýblıkalyq deńgeıdegi medısınalyq uıymdarda da kórsetiledi. Konsýltasııalyq-dıagnostıkalyq kómek nysanyndaǵy JMMK respýblıkalyq deńgeıde kórsetiledi. 17. Jergilikti deńgeıdegi medısınalyq uıym­darda stasıonar jaǵdaıynda JMMK kórsetý úshin ambýlatorııalyq-emhanalyq kómek kórsetetin medısınalyq uıymnyń mamany joldamany Emdeýge jatqyzý bıýrosynyń por­talynda tirkeıdi jáne ony pasıentke beredi. Ambýlatorııalyq-emhanalyq kómek kórsetetin medısınalyq uıymnyń mamany jergilikti deńgeıde joǵary mamandandyrylǵan medı­sı­na­lyq kómek kórsetý múmkindigi bolmaǵan jaǵ­daıda respýblıkalyq medısınalyq uıymǵa emdeýge jatqyzý máselesin sheshý úshin pa­sıenttiń qujattar paketin oblystardyń, res­pýblıkalyq mańyzy bar qalalar men astananyń densaýlyq saqtaýdy memlekettik basqarýdyń jergilikti organdarynyń joǵary mamandandyrylǵan medı­sınalyq kómek jónindegi komıssııaǵa (budan ári – JMMK komıssııa) qaraýǵa jiberedi. 18. Joǵary mamandandyrylǵan medısınalyq kómek kórsetetin jergilikti deńgeıdegi medısınalyq uıymdarda emdeýdiń barlyq ádisteri bar paıdalanylǵan stasıonarlyq emdeýdegi pasıentti emdeýge oń emdik tıimdilik bol­maǵan jaǵdaıda, al respýblıkalyq medısınalyq uıymdarda dıagnostıka men emdeýdiń joǵary tehnologııalyq ádisteri qoldanylýy múmkin res­pýblıkalyq medısınalyq uıymdarda emdeýshi dáriger bólimshe meńgerýshisimen nemese bas dárigerdiń emdeý isi jónindegi orynbasarymen birlesip, óńirlik komıssııanyń qaraýyna stasıo­narlyq naýqastyń medısınalyq kartasynan kóshirmeni faksımaldyq baılanys arqyly jiberedi. 19. JMMK komıssııanyń sheshimi stasıonar­lyq kómek nysanynda mamandandyrylǵan jáne joǵary mamandandyrylǵan medısınalyq kó­mekti kórsetý úshin azamattardy respýb­lıkalyq medısınalyq uıymdarǵa emdeýge jatqyzýdyń jáne konsýltasııalyq-dıagnostıkalyq kómek nysanyndaǵy JMMK kórsetýge jiberýdiń negizi bolyp tabylady. 20. JMMK komıssııanyń qaraýyna mynadaı qujattar usynylady: 1) pasıenttiń jeke basty kýálandyratyn qujattyń kóshirmesi; 2) pasıenttiń klınıkalyq dıagnozyn kórsete otyryp medısınalyq uıym mamanynyń jol­damasy; 3) pasıentti zerttep-qaraýdyń eń az qajetti kóleminiń nátıjeleri (qannyń jalpy taldaýy, neseptiń jalpy taldaýy, nájistiń ishekqurt jumyrtqalaryna taldaýy, keýde aǵzalarynyń flıýorografııasy, elektrokardıogramma jáne HbsAg bolýy); 4) óńirlik deńgeıde múmkin bolatyn klını­kalyq dıagnozdy, zertteý nátıjelerin kórsete otyryp, ambýlatorııalyq kartadan/syrqatna­madan kóshirme; 5) pasıenttiń klınıkalyq dıagnozyn rastaı­tyn zerthanalyq jáne aspaptyq zertteýlerdiń nátıjeleri. JMMK komıssııa pasıenttiń qujattar paketin syrttaı nemese qajet bolǵan jaǵdaıda pasıentti beıindi mamandardyń komıssııalyq qaraýy­na shaqyra otyryp, qaraýǵa quqyly. 21. JMMK komıssııasy usynylǵan qujat­tardy qaraıdy jáne pasıentti túrleri men kólemine jáne pasıent tasymaldanýyna sáıkes mamandandyrylǵan jáne joǵary mamanda­dyrylǵan medısınalyq kómek kórsetý úshin respýblıkalyq medısınalyq uıymdarǵa jiberýdiń negizdiligin anyqtaıdy. 22. Pasıenttiń qujattary kelip túsken sátinen bastap eki jumys kúniniń ishinde JMMK komıssııasy hattamalyq sheshim qabyldaıdy. 23. Respýblıkalyq medısınalyq uıymdarda pasıentke mamandandyrylǵan jáne joǵary mamandandyrylǵan medısınalyq kómekti kórsetý týraly oń sheshim qabyldaý kezinde JMMK komıs­sııasy joldamany Emdeýge jatqyzý bıýrosynyń portalyna tirkeıdi jáne jibergen medısınalyq uıymda basylyp shyǵarylǵan joldamamen qujattardyń paketin beredi. Medısınalyq uıym emdeýge jatqyzýǵa joldama alǵannan keıin pasıentti emdeýge jatqyzý týraly habarlaıdy. 24. Pasıentke mamandandyrylǵan jáne joǵary mamandandyrylǵan medısınalyq kómek kórsetýden bas tartý týraly sheshim qabyldaý kezinde JMMK komıssııasy Emdeýge jatqyzý bıýrosynyń portalyna bas tartýdy tirkeıdi jáne jibergen medısınalyq uıymǵa dáıekti bas tartýdy qosa bere otyryp, qujattardyń paketin qaıtarady. 25. Respýblıkalyq deńgeıde konsýltasııa­lyq-dıagnostıkalyq kómek nysanynda JMMK kórsetý úshin aıǵaqtary bolǵan jaǵdaıda am­býlatorııalyq-emhanalyq kómek kórsetetin me­dı­sınalyq uıym­nyń mamany JMMK komıs­sııasyna qaraý úshin pasıenttiń qujattarynyń paketin jiberedi. 26. Pasıentke respýblıkalyq deńgeıde kon­sýltasııalyq-dıagnostıkalyq kómek nysanynda JMMK kórsetý týraly oń sheshim qabyldaý kezinde JMMK komıssııasy joldamanyń elektrondy úlgisine tıisti joldardy toltyrý arqyly Emdeýge jatqyzý portalyna joldamany tirkeıdi jáne avtomatty qalyptasqan emdeýge jatqyzý kodymen basylyp shyqqan joldamany jibergen medısınalyq uıymǵa beredi. Medısınalyq uıym emdeýge jatqyzýǵa joldama alǵannan keıin medısınalyq uıym pasıentke joldamanyń kúni týraly habarlaıdy. 27. Pasıentke respýblıkalyq medısınalyq uıymda konsýltasııalyq-dıagnostıkalyq kómek nysanynda JMMK kórsetýden bas tartý týraly sheshim qabyldaý kezinde JMMK komıssııasy Emdeýge jatqyzý bıýrosynyń portalynda bas tartýdy tirkeıdi jáne ýájdemeli bas tartýdy qosa bere otyryp, qujattardyń paketin jibergen medısınalyq uıymǵa qaıtarady. 28. Pasıentterdiń quqyqtaryn qorǵaý, medı­sı­nalyq ǵylymdy damytý maqsatynda respýb­lıkalyq medısınalyq uıym pasıentti joǵary mamandandyrylǵan kómektiń josparly kólem­derinen 10% shekte medısınalyq aıǵaqtary bolǵan jaǵdaıda mynadaı adamdardy óz betinshe emdeýge jatqyzady: 1) áleýmettik-qorǵalmaǵan toptarǵa: 18 jasqa deıingi balalardy, júkti áıelderdi, Uly Otan soǵysyna qatysýshylardy, múgedekterdi, «Al­tyn alqa», «Kúmis alqa» alqalarymen marapat­talǵan kóp balaly analardy, ataýly áleýmettik kómek alýshylardy, jasyna qaraı zeınetkerlerge, áleýmettik máni bar naýqastarǵa; 2) shuǵyl jáne jedel medısınalyq aıǵaqtary kezinde; 3) Qazaqstan Respýblıkasy Densaýlyq saqtaý mınıstrligi ákimshilegen ǵylymı-tehnıkalyq baǵdarlamalardy oryndaý sheńberinde. Bul rette, respýblıkalyq medısınalyq uıym medısınalyq kómek kórsetý úshin pasıentti emdeýge jatqyzý týraly sheshim qabyldaý kezinde densaýlyq saqtaý salasyndaǵy ýákiletti organ bekitken tártippen Emdeýge jatqyzý bıýrosynyń portalynda joldamany tirkeıdi jáne ony medısınalyq kartaǵa qosady. 29. О́ńirlerdiń bóligindegi halyqtyń JMMK-ke degen qajettilikterin anyqtaýdy jáne jekelegen aýrýlar boıynsha joǵary mamandan­dyrylǵan medısınalyq kómektiń shekti kólemderin bekitýdi densaýlyq saqtaý salasyn­daǵy ýákiletti organ qurǵan medısınalyq tehnologııalardy standarttaý men baǵalaý jónindegi Saraptama keńesi júzege asyrady. 30. Medısınalyq uıymdardyń JMMK kórsetýine ruqsat berý densaýlyq saqtaý salasyndaǵy ýákiletti organ bekitken ólshemderge sáıkes júzege asyrylady. Buıryq Qazaqstan Respýblıkasynyń Ádilet mınıstrliginde 2010 jylǵy 29 jeltoqsanda Normatıvtik quqyqtyq kesimderdi memlekettik tirkeýdiń tizilimine №6711 bolyp engizildi.