Sóıtse áıeldiń ishinde aqshasy, bankomat kartochkasy bar sómkesin bir jigit qolynan julyp alyp, qasha jónelgen. Ony birden baıqaǵan Asylbek jigittiń artynan tura umtyldy. – On bes mınýttaı urynyń sońynan qýdym, aqyry ustadym. 34 jastaǵy jigit eken, polısııany shaqyryp, tapsyrdym. Menen qashamyn dep áıeldiń sómkesin ashyp ta úlgermepti, –deıdi A.Kenjın.
Lısakov qalasynyń 60 jastaǵy turǵyny Tatıana Shram jap-jas jigittiń myna qylyǵyna qatty qapalandy. – Qoryqqanymnan meniń jan daýysym shyqty, sol kezde uryny qýa jónelgen er kisini baıqadym, aqyry ustap aldy. Asylbekke alǵysym sheksiz, «polıseı – qashanda polıseı» dep beker aıtpaıdy ǵoı, – deıdi zeınetker T.Shram.
A.Kenjınniń ishki ister organynan zeınetke shyqqanyna úsh jyl boldy, biraq ol qashanda jattyǵýlardy tastamaı, óziniń dene shymyrlyǵyna jaýapkershilikpen qaraıdy. Jol polısııasynda qyzmet etkendegi polıseılik tásilderi bul joly da buzaqyny ustaýǵa múmkindik berdi. Qazir ol kásipkerlikpen aınalysady. Lısakov qalalyq ishki ister bólimi qylmyskerdi ustaýdaǵy kómegi úshin Asylbek Kenjınge Alǵys hat tapsyrdy.
Názıra JÁRIMBETOVA,
«Egemen Qazaqstan» Qostanaı oblysy, Lısakov qalasy
