• 17 Aqpan, 2017

Ońtústik Qazaqstan oblysynyń ákimi halyqqa esep berdi

394 ret

kórsetildi

4 mın

oqý úshin

Egemen Qazaqstan

Búgin Ońtústik Qazaqstan oblysynyń ákimi Janseıit Túımebaev 2016 jyly atqarylǵan jumystar boıynsha halyq aldynda esep berdi. Onda ákim ótken 2016 jyly óńirimizdiń ekonomıkalyq jáne áleýmettik salalarynda atqarylǵan jumystarǵa toqtalyp, aldaǵy jyldary iske asyrylatyn jumys josparlary týraly baıandady. Esepti kezdesýge jergilikti turǵyndarmen qatar, QR Parlamenti Senatynyń depýtaty Q.Aıtahanov pen Á.Bektaev jəne QR Prezıdenti Ákimshiliginiń Memlekettik ınspektory M.Imandosov qatysty. Aıta keteıik, óńir basshysynyń halyq aldyndaǵy jyldyq esebi bıyl alǵash ret onlaın rejımde Ońtústik Qazaqstan oblysy ákimdiginiń ontustik.gov.kz saıtynan kórsetilip, 3 mıllıonǵa jýyq halqy bar kúngeı turǵyndaryn qamtýda. Sondaı-aq, qazirgi Túrkistan saraıynda ótip jatqan jyldyq esepten bólek, árbir aýdan, qalalardaǵy ákimdikterde de jergilikti halyq jınalyp, jalpy sany 5 myńnan astam Ońtústik turǵyny atqarylǵan jumystardyń barysyn onlaın rejımde tyńdaýda. О́tken 2016 jyly atqarylǵan jumystarǵa toqtalǵan óńir basshysy ónerkásip salasynda 776,8 mlrd. teńgeniń ónimi óndirilip, 2015 jylmen salystyrǵanda 4,4%-ǵa artqanyn aıtty. Bul kórsetkish boıynsha bizdiń oblys respýblıkada 3 oryndy ıelenip otyr. Indýstrıaldyq – ınnovasııalyq damý baǵdarlamasynyń aıasynda byltyr 19 joba iske qosylyp, 600-den astam jumys orny ashyldy. 2016 jyly ındýstrıaldy aımaqtarynda 15 joba iske qosylyp, 6 mlrd. teńge ınvestısııa tartyldy. Jalpy, oblystaǵy ındýstrıaldy aımaqtarda 200,5 mlrd.teńgege 170 jobany iske asyryp, 12 myńnan astam jumys ornyn qurý josparlanǵan. «Bıznestiń jol kartasy - 2020» baǵdarlamasy aıasynda 303 jobaǵa qoldaý kórsetilip, 2126 jumys orny quryldy. Barlyq aýdan, qalalarda "Kásipkerlerge qyzmet kórsetý ortalyqtary" arqyly 37 232 adamǵa kómek kórsetildi. Oblys ekonomıkasyna ótken jyly 380,6 mlrd.teńge ınvestısııa tartyldy. Esepti jyly oblysta 530 myń sharshy metr turǵyn úı paıdalanýǵa berildi. Densaýlyq saqtaý salasynda 4 nysan, bilim salasynda 39, al mádenıet salasynda 8, sport salasynda 2 nysan qoldanysqa berildi. Sondaı-aq, «Jumyspen qamtý 2020 jol kartasy» baǵdarlamasy boıynsha 18,8 mlrd. teńge ıgerilip, nátıjesinde 72,2 myń adam qamtylyp, osy baǵdarlama aıasynda 36,2 myń turaqty jumys orny quryldy. О́tken jyly aımaqta 24 aýyz sý, 25 tabıǵı gaz nysandary paıdalanýǵa berilse, 640,9 shaqyrym avtomobıl joldary men eldi meken kóshelerine qurylys-jóndeý jumystary júrgizildi. Bul ótken 2016 jyly atqarylǵan jumystardyń bir parasy ǵana. «Sońǵy jyldary oblystyń agroónerkásiptik óndirisiniń damýynda oń úrdister baıqalyp otyr. Aýyl sharýashylyǵynda jalpy óniminiń ósý dınamıkasy saqtalyp, egin sharýashylyǵyn ártaraptandyrý, asyl tuqymdandyrý boıynsha jumystar jalǵasýda. Bul memlekettiń belsendi bıýdjettik saıasatynyń arqasynda múmkin bolýda. Esepti jyly aýyl sharýashylyǵynyń jalpy ónim kólemi 445 mlrd. teńgeni qurap, 2015 jyldyń sáıkes kezeńimen salystyrǵanda 4,9% artty. Egis kólemi 13 myń gektarǵa ulǵaıyp, 788,8 myń gektar boldy»,- dedi ákim. Aıta ketý kerek, Ońtústik dıqandary byltyr ortasha eseppen 633 myń tonna dándi daqyl jınasa, ol 2015 jylmen salystyrǵanda 8,9%-ǵa artyq. Dándi daqyldyń túsimdiligi ortasha 25,1 sn/ga qurap, Qazaqstannyń Táýelsizdik kezeńindegi eń úlken rekordtyq kórsetkishke qol jetkizildi. Sonymen qatar, 2016 jyly 1060 myń tonna kókónis, 1264 myń tonna baqsha ónimderi, 268 myń tonna kartop, 287 myń tonna maqta jınaldy. Bul joǵarǵy ónimdilik eńbekqor da isker jerlesterimizdiń arqasy dep bilemiz.