Farıza aqynnyń amanaty

Alaıda, án­niń orta tusyna kelgendegi ánshiniń oryn­daý­yndaǵy: «Ketti» dep Balqadısha estigende, Qushaqtap quz jartasty shirkin-aı jylaǵanym-aı, – degen shýmaqtar oıym­dy eriksiz bólip jiberdi. Án aıaq­tal­ǵannan keıin dástúrli ánshiden ne­ge bulaısha oryndaǵanynyń mánisin su­ra­dym.

Sóıtsek, munyń ózindik sebebi bar eken. «Osydan on shaqty jyl buryn Se­meı­ge alashtyń aıaýly aqyn qyzy Fa­rıza Ońǵarsynova apamyzdyń kel­geni bar. Sol kezde eldi aralap, Abaı aý­danynda bolyp, ulylarǵa taǵzym etip qaıtqany da esimde. Qurmetti qo­na­ǵymyz Semeıge kelip túskende qarsy alý­shy toptyń ishinde ózim de boldym. Keshki otyrystyń birinde aqynnyń aldynda «Balqadıshany» shyrqadym. «Balam, kelshi, otyrshy qasyma», de­di maǵan Farıza apam ándi oryndap bol­ǵan­nan keıin. Qasyna otyrdym.

Sosyn aıt­ty: «Balqadısha» ǵajap án ǵoı. Bul án­di ózim keremet jaqsy kóremin. Biraq osy ánniń «qushaqtap qus jastyqty jy­ladym» degen jerine óz basym kelise qoımaımyn. Aqan qatardaǵy azamattyń biri emes, jigittiń tóresi, erdiń eri emes pe? Segiz qyrly, bir syrly tulǵa. Sondaı azamattyń qus jastyqty qushaqtap, tóseginde búk túsip jylap jatqanyn kóz aldyńyzǵa elestetip kórińizshi. Jaraspaıdy ǵoı.

Al endi quzdaǵy bir jartasty qushaqtap, taýmenen muńdasyp, taspenen syrlasyp, muń-zaryn, qaıǵysyn tabıǵatpen bólisse, munyń jóni bólek qoı. Naǵyz sýret osy emes pe? Sondyqtan, sen endi «quz jartasty qushaqtap jyladym» dep aıtshy» dedi. Keıbir ánshiler: «ker bestini qushaqtap jyladym» dep te aıtyp júr. Ol da ádemi. «Qus jastyq Aqanda bolmaǵan» deýshiler de bar.

Qalaı bolmaǵan? Ákesi saýdager bolǵan adam. Enshisin úlestirgen kezde qus tósekti bermedi deısiń be? Aqanda qus jastyqtyń bolǵany anyq. Biraq shyndap kelgende, er-azamattyń qus jastyqty qushaqtap jylaǵany qısynǵa kelmeıtindeı kórinedi. Farıza aqynnyń aıtqan sózi kóńilime qondy.

Sodan beri osylaı oryndap kelemin», deıdi dástúrli ánshi. Munyń anyq-qanyǵyn ónert­a­ný­shy­­larymyz, ónerdiń mańynda júrgen aza­­mattarymyz jan-jaqty zerdelep, baı­y­p­tap, bir izge túsirer dep oılaımyz. Al biz sóz etken Berik Omarovtyń oryn­daýyndaǵy nusqa da qısynǵa ke­letin sekildi, serige qara jerdi emes, qus jastyqty emes, quz jartasty qushaqtatqan shýmaqtar júrekke jyly tıetin sekildi.

Azamat QASYM, 

«Egemen Qazaqstan»

Shyǵys Qazaqstan oblysy