Depýtat Úkimet pen Bas prokýratýradan azyq-túlik baǵasyn tómendetýdi surady

Májilismen Turǵyn Syzdyqov 24 taýar túriniń eki esege qymbattaǵanyn aıtty. Depýtat osy másele boıynsha premer-mınıstr Baqytjan Saǵyntaev pen Bas prokýror Jaqyp Asanovqa saýal qoıdy, dep habarlaıdy Tengrinews.kz. "Halyq álemdik ekonomıkadaǵy daǵdarysqa túsinistikpen qaraıdy. Biraq negizgi taýar ónimderi men dári-dármekterdiń baǵasynyń qymbattaýy adamdardy alańdatady", - dedi Syzdyqov Parlament Májilisiniń plenarlyq otyrysy barysynda. Onyń aıtýynsha, qaraqumyq, kartop, qant, jumyrtua, tuz, pııaz, qııar jáne qyzanaq ónimderiniń baǵasy qymbattaǵan. Osyǵan baılanysty Syzdyqov quqyq qorǵaý organdarymen birige otyryp, azyq-túlik ónimderiniń baǵasyna áser etip jatqan deldardyń kózin joıý maqsatynda keshendi sharalardy qoldanýdy usyndy. "Atqarýshy organdarǵa áleýmettik dúkenderdegi, saýda bólimderindegi, kommýnaldyq naryqtaǵy baǵany retteýdi, jetkiziletin taýardyń sapasy men sanyn tekserýdi mindetteý kerek. Otandyq ónimderdi bazardaǵy saýda oryndaryna tikeleı jetkizý máselesin qarastyrý kerek", - dedi depýtat. Eske sala keteıik, osyǵan deıin úkimettegiler azyq-túlik baǵasynyń qymbattaý sebebin túsindirgen bolatyn. "Maýsymdyq aýytqýdyń áseri. Jyl saıyn taýardyń jekelegen túrleri boıynsha qoımadaǵy qordyń azaıýyna baılanysty olardyń baǵasy qubylyp turady. Bul eń aldymen kókónister: kartop, sábiz, pııaz, qyryqqabat, qyzylsha. Baǵa, ádette, mamyr-tamyz aılarynda kóteriledi. Tórtinshiden, eksporttyq jetkizýdiń áseri. Eýrazııalyq ekonomıkalyq odaq aıasynda, Reseı men Qyrǵyzstannyń shekara mańyndaǵy baǵalardyń ósken jaǵdaıda ishki naryqtaǵy taýarlar quny da kóteriledi. Búgingi tańda joǵaryda atalǵan faktorlar baǵanyń ósýine áser etti, jyl sońyna deıin aıtarlyqtaı ósim bolmaıdy dep kútilýde", - degen edi Qýandyq Bıshimbaev.