Bul jalǵannan bereke tappaǵan taǵdyr

Álem jurty ánin tyńdap, Alla bergen talantyna tamsanǵan Ámireniń ǵumyry qupııa, jumbaqqa toly boldy. Tipti bertinge deıin kúmis kómeı ánshi ómiriniń kóleńkeli tustarynan kópshilik qaýym beıhabar-tuǵyn. Mine, jazýshy, dramatýrg Rahymjan Otarbaev «Ámire» dramasynda pánı jalǵannan bereke tappaı, keń dúnıesi áp-sátte kem dúnıege aınalǵan áıgili ánshiniń taǵdyr-talaıyna tereńirek úńiledi. Keshegi jeksenbide Q.Qýa­nyshbaev atyndaǵy memlekettik akademııalyq qazaq mýzykalyq drama teatry «Ámire» dramasyn qoıyp, sahna tórinde has talanttyń ómirden kórgen qı­yndyqtaryn, qupııalaryn, ishki syryn, muńyn ashyp kórsete bildi. Spektakldiń óne boıynda saǵynysh pen qorqynysh alma-kezek alysyp, bir sátte elge, jerge, otbasyǵa, ónerge, keń dúnıege degen saǵynysh júregińniń ná­zik qylyn shertse, endi bir sátte qorqynysh, úreı, azap, qa­tygezdikti kórip, júregińiz qan jylaıdy. Taǵy bir aıtary, bul qoıylymnyń mýzykalyq kórkemdelýi de kórermenge óte erekshe áser etti. Ámireniń áýeletip salǵan ánin tóńiregindegiler ilip áketip, hormen aıtýy teatr akterleriniń ónerin taǵy bir qyrynan tanytqandaı. Bul tusta hormeıstr, QR Eńbek sińirgen qaıratkeri Amantaı Jumashevtyń eńbegin aıryqsha atap ketý qajet. Spektakldiń qoıýshy rejısseri – Qazaqstannyń Eńbek sińirgen qaıratkeri Nurlan Jumanııazov. Ámire beınesin teatr ártisi Qasymhan Buǵybaı somdady. – Bul pesa buǵan deıin birneshe márte qoıyldy. Osy ýaqyt ishinde kem-ketigi túzelip, tolysty ǵoı dep oılaımyn. Jalpy, bul Ámireniń alǵashqy sahnalyq beınesi bolǵandyqtan, rejısserge de kóp aýyrtpalyq tústi. Sondyqtan, rejısser Nurlan Jumanııazovtyń eń­begi óte zor. Akterlerdiń de sheberligi kóńilimnen shyq­ty. Ras, ótken ǵasyrdyń repres­sııa qasiretteri týraly talaı ret jazyldy. Ár qalam­ger sol zulmatty ózindik erek­­shelik­termen kórsetkisi keldi. Men de Ámire týraly shy­ǵar­mamda solarǵa uqsaǵym kelmeı, basqa qyrynan keldim, – deıdi bul jóninde «Ámire» pe­sasynyń avtory, belgili jazýshy Rahymjan Otarbaev. Oralhan DÁÝIT, «Egemen Qazaqstan» ASTANA