Shákir aqynnyń kók qarshyǵasy

Jaqynda Semeıge jol túsip, Abaı qoryq-murajaıyn aralaǵanda sondaǵy bir jádigerdiń nazarymdy ózine erekshe aýdarǵany bar. Murajaıdaǵy «Shyraıly Shyńǵystaý» kórmesin tamashalaǵanda sol bólmeniń buryshynda, bir qaraǵanda baıqalmaıtyn eleýsiz jerde, joǵaryda uıada otyrǵan qus kózge ystyq kórindi. Sóıtsek, bul jaı qus emes, áıgili Shákir aqynnyń qarshyǵasy eken. Muny bizge Abaı murajaıynyń dırektory Bolat Júnisbekov aıtty. 1991 jyly Elbasyna aq batasyn bergen aqynnyń saıatshylyqpen shuǵyldanǵany da belgili. Abyz aqsaqal qarshyǵasy ólgennen keıin onyń tulybyn óz qolymen jasap, úıinde qaldyrǵan eken. Bul jádigerdi byltyr jeltoqsan aıynda aqynnyń qyzy Sana apamyz murajaıǵa ákep tapsyrypty. Aqyn bul qarshyǵany qaı jyldary ustaǵan? Jalpy, batagóı qarııanyń qansha qarshyǵasy bolǵan? Osy jáne ózge de saýaldarymyzǵa jaýap izdep, Abaı aýdanynyń Qundyzdy aýylynda turatyn, sondaǵy Shákir Ábenov atyndaǵy murajaıdyń jetekshisi, tektiniń tuıaǵy Sana Shákirqyzyna telefon shaldyq. – «Jigitke jetpis óner de az» deıdi ǵoı. Shákir atań aıtýly aqyn ǵana emes, ózi atbegi, ózi qusbegi, ózi aǵashtan túıin túıgen sheber adam bolǵan. Júırik at, qumaı tazy ustaǵan. Ákem qarasha týa saıatshylyqqa ketetin. Biraz ýaqyt úıde bolmaıtyn. Qusbegiligine kelsek, bul ónerdi ótken ǵasyrdyń 1972-1973 jyldarynan bastap janyna serik etti. Kólembaı Álimbekov degen inisi ekeýi bir saıatshylyqqa barǵanda qarshyǵanyń erkegi men urǵashysyn alyp kelgen eken. Jalpy, ákem bir emes, birneshe qarshyǵa ustady. Naqty sany esimde joq. Al Abaı murajaıynda turǵan qarshyǵa Shákir atańnyń eń sońǵy qarshyǵasy. Aty – Kókqus. Qatelespesem, bul qus 1988 jyly óldi. Sol kezde ákem ony óz qolymen tulyp qylyp jasaǵan edi, – deıdi asyldyń synyǵy. Shákir aqyn qustardy erekshe jaqsy kórgen eken. Qarshyǵadan bólek tyrna men kepterlerdi de asyraǵan kórinedi. Kepterleri ashyqqan kezde aqynnyń qos ıyǵyna qonaqtap otyrady eken. Sana Shákirqyzy ákesiniń báıgeden kelgen atynyń júldelerin kóp balaly analarǵa taratyp beretin Atymtaı jomart minezin de saǵynyshpen eske aldy. Azamat QASYM, «Egemen Qazaqstan» Shyǵys Qazaqstan oblysy Sýretti túsirgen avtor