20 jyldyqqa – 20 ınnovasııalyq joba

USYNYP OTYRǴAN ÁL-FARABI ATYNDAǴY QAZMÝ-de ULYQ NAÝRYZ ATALYP О́TTI О́.Joldasbekov atyndaǵy Stýdentter saraıynyń aldyndaǵy aýmaqty alań kók­tem shýaǵyna tolyp, qyzyldy-jasyldy gúlderge bólengendeı. Adamdardyń jú­zi­nen mereke shattyǵy esedi. Qalyqtaǵan án men kúı. Kóktem beınesindegi sulý qyz aqqýdaı terbele, mereke dýman bas­tal­ǵanyn pash etti. Osy arada jalǵasqan arnaıy baǵ­dar­lamada halqymyzdyń ult­tyq rýhy, salt-dástúri, óneri kórinis tap­qandaı boldy. Bir aıtarlyǵy, bul kúngi Naýryzda tek qazaq ánderi aıtyldy, baǵdarlama bastan-aıaq qazaqsha júrgizildi. Qalyńdyq izdep júrgen attyly jigitterdiń Qyz Jibektiń kúımesine mingen QazMÝ-dyń sulý qyz­da­ryna jolyǵyp, tanysý rásiminde aına­lany án-kúıge bóleýi, jastardyń jarasty ázil-kúlkisi ulttyq ádet-ǵurpymyzdyń bir qyryn meńzep kórsetti. Odan ári kúm­bir­legen kúı de, qazaqtyń halyq ánderi de, Nurǵısa men Shámshi sııaqty birtýar saz­gerlerimizdiń ánderi de, aqyndar aıtysy da boldy. Halyqaralyq qatynastar fakýlteti janyndaǵy «Taleıran» dıplo­matııalyq klýbynyń stýdentteri tamasha mýzykalyq-bı kompozısııasyn usyndy. Atalmysh fakýltette ártúrli elderdiń, sonyń ishinde Irannyń, Aýǵanstan men Tájikstannyń jastary oqıdy. Olar ǵajap beıneler, áýender men bıler arqyly Naý­ryz merekesiniń tereń tamyrly bastaý­la­ry jaıynda áńgimeledi. «Qara jorǵa» bıine ardager ustazdar men jetkinshekter de aralasty. О́ner kórsetkender túgeldeı ýnıversıtettiń óz stýdentteri ekenine súı­sindik. Tek baǵdarlama túıininde merekeniń qurmetti qonaǵy Eskendir jáne Birjan Hasanǵalıevter «Atamekendi» shyrqaǵanda barsha qaýym olardyń ánine qosyldy. Stýdentter saraıynyń tóbesindegi bıikten Qydyr ata Naýryzdyń aq batasyn berdi. Mereke ústinde rektor Ǵalymqaıyr Mutanov irgeli ǵylymı-zertteý ortaly­ǵy­na aınalýǵa baǵyt ustaǵan, el Táýel­siz­diginiń 20 jyldyǵyna 20 ınnovasııalyq joba usynyp otyrǵan ýnıversıtettiń bilim berý salasyndaǵy jarqyn jetistikterin aıta kele, úzdik kafedra, úzdik fakýltet, úzdik qurylymdyq bólimshe jáne úzdik jataqhana usynymdary boıynsha jarys jeńimpazdaryn baǵaly syılyqtarmen jáne dıplomdarmen marapattady. Qorǵanbek AMANJOL. ________________________________ Sýretterdi túsirgen Vadım MAHIN.