Nursultan Nazarbaev: Biz áıeldi joǵary baǵalaǵan halyqpyz

Búgin Aqordada Elbasy Nursultan Nazarbaevtyń Qazaqstannyń áıelder qaýymy ókilderimen «Kóktem shýaǵy» atty kezdesýi ótip jatyr. «Qymbatty hanymdar! Aldaǵy kele jatqan mereke - áıelder kúni barshańyzǵa qutty bolsyn! Baq-bereke, jaqsylyq tileımin! Búgin bizdiń ortamyzda áıel azamattarynyń ár salada qyzmet istep júrgen ókilderi bar. Kóp balaly analar, depýtattar, ǵalymdar, sot, dıqan, kásipker, ónertapqysh, dáriger, ánshi, jýrnalıst, aktrısa, sportshy, jaýyngerge deıin aramyzda otyr. Biz anany, áıeldi ár ýaqytta qurmettep, joǵary baǵalaǵan halyqpyz. Batyr analarymyz el basyna kún túskende erlermen birge qolyna qarý alyp, Otanyn qorǵaǵan. El úshin er-azamattarmen birge jaýǵa shapqan baıaǵydan kele jatqan, bizge belgili Bopaı hanym, Hıýaz Dospanova, Álııa, Mánshúkter óshpes erlikterimen eldiń sanasynda qalǵanyn bárimiz bilemiz. Qazaq áıelderiniń arasynda zor qurmetke bólengen úlken analarymyz Domalaq ana, Aısha bıbi, Aıǵanym hansha, Zere ájelerimiz parasattyń sımvoly bolyp sanalady. Búgingi Qazaqstan áıelderi sol parasatty jalǵastyratyn, jolyn jalǵaıtyn izbasarlary. Áıel úıdiń qazyǵy dep áıelin qurmettegen halyqpyz. Qyz ósse eldiń kórki dep qyzyn qurmettegen halyqpyz. Uly dalada qıly zamannan kele jatqan ıgi dástúr qazir de jalǵasýda», - dedi Nazarbaev. Sonymen qatar Prezıdent memlekettigimizdiń nyǵaıýyna áıelderdiń qosqan úlesi erekshe ekenin atap ótti. "Elimizde eńbek etetin azamattardyń teń jartysynan kóbi qyz-kelinshekter. Áıelder Úkimet quramynda, Parlament qabyrǵasynda, túrli  deńgeıdegi ákimdikterde tabysty jumys jasaýda", - dedi Elbasy. Onyń aıtýynsha, bilim berý salasynda 65, densaýlyq salasynda 75, memlekettik qyzmette 55 paıyz áıelder jumys isteıdi. Jeke kásipkerliktiń teń jartysy, shaǵyn jáne orta bıznestiń  42 paıyzy áıel azamattardyń qolynda. «Bolashaq» baǵdarlamasymen shetelden bilim alǵan 12 myńnan astam jastyń teń jartysy qyzdar.