Jol jóndeý jalǵasady

Astanada bıylǵy jylǵy jol-qurylys jumystarynyń maýsymy bastaldy. Onda negizgi ekpin qalanyń tarıhı bóligi men onymen birikken turǵyn ala­byndaǵy avtomobıl joly­nyń ınfraqurylymyn jetildirýge túsirilgen. Astana qalasy ákimi apparatynyń baspasóz qyz­metiniń málimetterinshe, má­s­elen, 23,7 shaqyrym jol sa­lynyp, 10 shaqyrymyna jón­deý, 18,5 shaqyrym jolǵa qaıta jóndeý jumystary júrgiziledi dep josparlanǵan. Sondaı-aq, qalamen birikken eldi-mekenderde 55,7 shaqyrym jol salynýy tıis bolsa, jolaýshylar kóligi jáne avtomobıl joldary bas­qarmasy jańa 11 turǵyn ala­byn­da jalpy uzyndyǵy 140,88 shaqyrym bolatyn jol jelisin salý jobasyn daıyndaýǵa kirisip ketken. Qurylys qarjy bó­lingennen keıin júzege asyryl­maq. Jóndeý jumystary 9 sáýir­de qalanyń tarıhı bóligindegi eki mańyzdy kóshe – Jeńis dańǵyly men Imanov kóshesinen bastaý aldy. 2001 jyly Jeńis dańǵy­lyna kúrdeli jóndeý júr­gizilgen bolatyn, alaıda, kóptegen apatty jaǵdaılarǵa baılanysty jol tósemi birneshe márte ashyl­ǵan. Bul óz kezeginde, búgingi kúıine keri áserin tıgizdi. Osyny eskere otyryp, avtomobıl jo­lyna kúrdeli jóndeý júrgizýmen qatar, onyń astynda ornalasqan kommýnıkasııalar – apattyq jaǵ­daıda ornalasqan jylý júıesi, sý qubyry men kárizdi keshendi aýys­tyrý jóninde sheshim qabyl­danǵan. Bul nysandardyń kópshi­ligi 70-jyldardyń ortasynda sa­lynǵan. Alaıda, olardyń keıbir bólshekteri, máselen, káriz jeli­siniń bir bóligi 40-jyldary aǵash­tan jasalǵan. Jalpy alǵan­da sońǵy úsh jyl ishinde ınjenerlik jelilerdiń eskirýi nátı­jesinde 35 iri apat oryn alǵan jáne olardyń saldaryn joıý maqsatynda jol tósemin qazý jumystary júrgizilgen. Jeńis dańǵyly men Imanov kóshesin qaıta jóndeý joba­syna sáıkes jańa ınjenerlik jeliler salý, eski ınjenerlik jelilerdi aýystyrý jáne qaıta salý, kólik qozǵalatyn jol bó­ligin keńeıtý, qosymsha avto­tu­raq oryndaryn, jaıaý júrgin­shige ar­nalǵan joldar salý, jańa baǵdarsham, jyldamdyq ól­sheýish­ter, jol belgileri jáne jol qozǵalysyn retteıtin basqa da tehnıkalyq qurylǵylardy ornatý qarastyrylǵan. Atalǵan jobany júzege asy­rýda sý júıesin ýaqytsha aǵytý, sondaı-aq, atalǵan magıstraldar boıynsha qoǵamdyq kólik qozǵalysy kestesine ózgeristiń engizilip, joldarǵa shekteý qoıý­ǵa baılanysty turǵyndarǵa birqatar qolaısyzdyq týǵyzary belgili. Osyǵan baılanysty Astana qalasynyń jol polısııasy basqarmasy avtokólikterge aınalma jolmen júrýdi aldyn-ala josparlap, joldardy aına­lyp ótýdiń belgilengen syzba­laryn paıdalanýǵa keńes beredi. Qaıta jóndeý jumystary kezinde avtokólik júrgizýshile­rin eskertý maqsatynda Jeńis dańǵyly men Imanov kóshe­sindegi úılerdiń kireberisterinde eskertý jáne tyıym salatyn jol belgileri ilinbek. Ábdirahman QYDYRBEK.