Halal degeni – haram

Masqara! Qandaı jolmen bolsa da tek jeke basynyń baıýyn kózdeıtin keıbir kázzap­tar adamdardyń qadir-qasıetin, qur­met tutyp, júreginiń eń tereń túkpirine saq­taıtyn asyl qundylyqtaryn aıaq asty etýge de bara beredi eken. Máselen, Sol­tús­tik Qazaqstan oblysy Aqqaıyń aýdany­nyń Shaǵalaly (orysshasy Chaglınka) kentinde turatyn Medennıkov degen bir kásip­ker halal brendimen «Musylman» atty shujyq shyǵaryp kelgen. Musylman­dar­dyń ejelden shoshqa etin jemeıtinin, ony aýyzǵa alýdy aram dep sanaıtynyn bile tura (ony Qazaqstanda turatyndar ǵana emes, orta bilimi bar barlyq adamzat biledi) aqsha tabý­dy ǵana kózdegen kásipker «Musyl­man» atty shujyqqa shoshqa etin aralastyryp otyrǵan. Mundaıdy «bilmeı qalǵannan bolypty» dep eshkim de aıta almas. Demek, ol musylmandarǵa sanaly túr­de aramdyq oılaǵan jan bolyp shyǵady. Májilistiń 13 sáýirde bolǵan sońǵy jal­py otyrysynda depýtat Baǵıla Baı­maǵam­betova ózine belgili bolǵan osy faktini ja­ıyp salyp, Premer-Mınıstrdiń orynbasa­ry – Indýstrııa jáne jańa tehnologııalar mınıstri Áset Isekeshevke resmı túrde sa­ýal joldap, «Tutynýshylar qu­qyq­taryn qorǵaý týraly» Zańǵa sáıkes óz jumysyna jaýapsyz qarap, alaıaqtyqqa jol berip, las bıznespen aınalysyp, adam­dardy qasaqana aldaǵany úshin Meden­nıkov­tiń lısenzııasyn qaıtyp alý máselesin qarastyrýdy ótindi. Bizdińshe, bul ispen Ishki ister mınıstrligi de aınalysýy kerek sııaqty. О́ıt­keni, jylyna 229 tonna shujyq ónimderin óz kásipornynyń 6 fılıalynda shyǵaryp, ony musylman brendimen satyp otyrǵan Medennıkov myrza uzaq ýaqyttan beri qa­zaq­standyq musylmandardy kózdi jumyp qoıyp aldaýmen aınalysyp kelgen. Olar­dyń qadir tutatyn qundylyqtaryn aıaǵyna basqan. Medennıkovtiń shujyqtaryn «Mu­sylman» dámi degen atyna bola aýzyna alyp kelgen talaı shynaıy musylmandar ishinen dońyz etiniń shyqqanyn bilgen soń ushynyp, aýyryp qalýy da ǵajap emes. Demek, Medennıkov qazaqstandyqtardyń densaýlyqtaryna qasaqana zalal keltirgen qaýipti qylmysker dep baǵalaýǵa da bolmas pa eken? Árıne, onyń áreketteriniń quqyqtyq baǵasyn ishki ister organdary jiti tekserip, isin sotqa jetkizse, jazasyn ádil sot qana beredi. Biraq, kórinip turǵan aıqyn aıǵaqty óz atymen ataýǵa bizdiń de qaqymyz bar. Mine, osy másele aıaǵyna deıin jetkizilip, zańǵa sáıkes alaıaqtyń tıisti jazasy berilse, keıbireýler oılanyp, qazaq­stan­dyq musylmandardyń quqyn syılaýdy, olardyń qundylyǵyn aıaqqa baspaýdy keýdesine túıer edi. Sondyqtan da bul istiń qaǵıdatty túrdegi mańyzy zor dep bilemiz. Jaqsybaı SAMRAT.