Almatyda ótken alǵashqy keshte qazaqtyń kórnekti aqyndary men ánshileri atalǵan jobaǵa qatysyp, kórermen kózaıymyna aınalǵan edi. Endi bul joba elimizdiń birqatar oblystarynda da júzege asyrylyp, el ishindegi talanttardy tanytýǵa septigin tıgizip keledi.
Ejelgi shyǵys poezııasynan bastap kúni búginge deıin jyrlanyp kele jatqan kóne Taraz – taǵdyrly jyrlardyń arqaýy. Fırdoýsı, Hafız ǵazaldarynan osy ǵasyrda qaıta túlep, qasıetti qara óleńge at baılaǵan jastar Taraz topyraǵynda da az emes. Búginde óleń órnektegen ólkede ómir súrip júrgen jastardy qoldaý maqsatynda oblys ákimdigi mádenıet, arhıvter jáne qujattama basqarmasynyń oblystyq halyq shyǵarmashylyǵy ortalyǵy men «Husnıhat» ádebıetti qoldaý qoǵamdyq qorynyń birlese uıymdastyrýymen Ulystyń uly kúni qarsańynda jergilikti jas aqyndar men ánshilerdiń «Bir óleń, bir áýen» keshi ótti.
Almatydan arnaıy kelgen belgili aqyn, Halyqaralyq «Alash» ádebı syılyǵynyń ıegeri Maraltaı Raıymbekuly men qor prezıdenti, aqyn Ǵalym Qalıbekuly jastarǵa qoldaý kórsetip, ádebı-sazdy keshke qatysty. Al basqarma basshysy Dúısenáli Byqybaev aldaǵy ýaqytta jastardyń shyǵarmashylyǵyn damytý maqsatynda budan da aýqymdy jobalardyń qolǵa alynatyndyǵyn kesh barysynda aıtyp ótti. Mundaı keshter jastardyń tanylýyna, shyǵarmashylyq turǵydan shyńdalýyna úlken áser etetini sózsiz. Sondaı-aq, «Bir óleń, bir áýen» dep keshtiń aty aıtyp turǵanyndaı, jobaǵa qatysqan árbir aqyn óziniń óleńin oqyp, odan keıin sol aqynnyń sózine jazylǵan ánder shyrqalady. Bul kúni Perızat Ospanova, Nurjan Álish, Danııar Álimqul, Araıly Jaqsylyq jáne ózge de jergilikti jas aqyndar óz óleńderin oqysa, aqyn óleńderine jazylǵan ánderdi Ǵanı Mátebaev, Qaısar Kókishov, Tolǵanaı Atabaılar naqyshyna keltire oryndap, kesh kórigin qyzdyrdy.
Hamıt ESAMAN,
«Egemen Qazaqstan»
Jambyl oblysy
