Aldymen shekara jabylady. Memlekettiń ishinde de barlyq jerde tekserý, tintý, arakidik atys-shabystyń daýsy estilip qalatyn. Ábekeń sol jaqta túsirilip, montajdalǵan sıýjetin Shymkentke jetkizip, oblystyq telearna arqyly Almatyǵa jiberip júripti. О́zge jol da, ádis te joq. Ol úshin shekarany kesip ótýi kerek. Keıde keden beketine kelip, Tashkent jaqtan, saǵattap ruqsat kútip otyrǵan kezderi de bolǵan. Otbasy Almatyda turady. О́ıtkeni, Tashkentte qazaqsha oqytatyn mekteptiń reti kelmegen.
Birde kóktemgi demalysqa ákesin saǵynyp izdep kelgen balalaryn Shymkentten poıyzǵa otyrǵyzyp jibermekshi bolyp, jolǵa shyǵady. Minip júretin kóligi – sol О́zbekstanda shyǵatyn, el «bólke nan» atap ketken «DAMAS». Artynǵan-tartynǵan sómkeleri bar. Shekaraǵa jaqyndaı bere mılısııa toqtatady. Qyzmettik kýálikterin kórsetkenimen, olarǵa asa áser ete qoımaıdy. Tekserý sómkelerdi tintýge kelgende, bir shetinen qyltıyp tapanshanyń uńǵysy kórinedi. Ári qaraı Ábdez Rahmanulynyń óz sózimen sabaqtaıyq.
«Birinshi bolyp meniń ózim shoshyp kettim. Salǵan jerden bireýler bildirmeı ádeıi tastap jiberdi me, degen oı keldi. Kádimgideı sasqalaqtadym, anda-sanda aıtatyn ózbekshemdi de umytyp qaldym. Ashýlansam orysshaǵa kóship ketetinim bar. Boqtyq ta ketip qaldy. Ony baıqaǵan mılısııa entige umtyldy. Shynymen tapansha. Áıelimde ún joq, qyzym men 9 jasar ulym mashınanyń bir buryshyna tyǵylyp qalypty. Men «ımanymdy úıirip», túrmeni kózime elestete bastadym. Aqyryn saýsaǵynyń ushymen ustap, tapanshany aldy. Ári-beri aýdaryp kórdi. Arǵy jaqta turǵan komandırin shaqyrdy. Men tipti dem alýdan qaldym, kózim sharasynan shyǵyp barady. Ábden qorqyp qalǵandyqtan-aý shamasy, áıelim bop-boz bolyp otyr. Bir kezde balama til bitti. Jylamsyrap, «meniń pıstoletim ǵoı» dedi.
O, Alla, týra shyn tapansha. Mılısıoner de asa senbeı tur. Maǵan jan biteıin dedi. Úıde júrgende qyzyma oıynshyq pıstoletimen sý shasha bergen soń urysqanym esime tústi. Sol kezde baryp, arqamdy jýyp ter aqqanyn sezdim. Qaıtadan bar biletin ózbekshemdi tilimdi burap turyp aıtyp, túsindire bastadym. Adam joq jaqqa baǵyttap, shúrippesin basqan kezde tyz etip sý atyldy. Mılısıoner ekeýmizde kereǵar eki sezim. Men páleden qutyldym ǵoı deımin, ol «qap, bir maqtaý estir edim» dep tur, qatýlanyp maǵan qarap.
Shekaradan beri ótken soń, Qazaqstanǵa, joldyń shetine shyǵyp toqtap, bárimiz ishek-silemiz qatyp kúldik. Meniń qısaıtyp ózbekshe sóılegenimdi áıelim men balalarym esterine túsirip, keleke etip salady. Balamnyń qorqyp dirildegeni sonsha, ápkesiniń qoınyna tyǵylyp, ánsheıinde aýzy jabylmaıtyn, tilinen aıyrylyp qalǵanyn aıtamyz. Áıelimniń sóz taba almaı «oı-oı-oı» deı bergeni. Ábden kúlip bitken soń balamdy biraz qýyryp aldym. Qaıdaǵy páleni taýyp alǵandyǵyn aıtyp. Biraq, ol shekarada sonsha tekseretinin qaıdan bilsin» deıdi aqkóńil, adal peıildi, aýzyn ashsa júregi kórinetin áriptesimiz.
Ǵalymjan ELShIBAI,
«Egemen Qazaqstan»
