Qazaqstan Respýblıkasy Prezıdenti Arhıvi óz mekemesinde tarıhı materıaldarmen jumys isteýdiń maıtalmandarymen syr-suhbat ótkizip otyratyn baıyrǵy dástúrine sáıkes, «Máńgilik El» qaıratkerleri: «Jazýshy jáne arhıv» taqyrybynda S.Elýbaımen shyǵarmashylyq kezdesý uıymdastyrdy. Kezdesý taqyrybynyń kirispesi retinde aldymen otyzynshy jyldardyń asharshylyǵy týraly birinshi bolyp qalam terbep, kórkem dúnıe týǵyzǵan S.Elýbaı shyǵarmalarynyń ıdeıasymen ózektes derekti fılm kórsetilip, jantúrshigerlik jyldardyń aqıqaty arhıvte saqtalǵan tarıhı qundy beınematerıaldar negizinde shıratyldy.
Jazýshynyń «Aq boz úı» tarıhı romany týraly arnaıy baıandama jasaǵan arhıv qyzmetkeri Aınash Seısenbaeva shyǵarma mazmunyndaǵy rýhanı dúnıetanym, ulttyq salt-sana, ótken dáýirlerdiń turmystyq-moraldyq normalaryn tanytatyn qundylyǵy týraly áńgimeledi.
Qazaqstan Jazýshylar odaǵy tóraǵasynyń orynbasary, aqyn Ǵalym Jaılybaı jazýshynyń qazaq prozasynda ózindik iz qaldyrǵan, taqyryby tyń, oıy ózekti «Aq boz úı» trılogııasyn aýmaly-tókpeli dáýir shyndyǵy, asharshylyq týraly óz qalamynan týǵan «Tamakóshken» atty poemasymen qatar shendestire otyryp, eki shyǵarmanyń ózegindegi aqıqattyń tarıhyn baıandap, trılogııa týraly jan-jaqty paıymyn bildirdi.
Al, Smaǵul Elýbaıdyń ózi sherli jyldardyń shejiresin aqtarýǵa ýaqyttyń ózi túrtki bolǵanyn, adam sanaǵy kezinde aıyryqsha artta qalǵany bilinetin demografııalyq kórsetkishtegi ádiletsizdiktiń qasiretti jyldardyń tarıhyn zertteýge jetelegenin aıtyp, ulttyń tanymy men mádenıetine, tili men dinine salǵan qara tańbasynyń áli kúnge joıylmaı kele jatqanyna ókinish bildirdi. Zulmat qurbandaryna arnalǵan memorıaldyq keshen qurylysynyń kesheýildep jatqanyna da keıistik tanytyp, bul turǵyda ótken tarıhyn ulyqtaýda ónege kórsetip otyrǵan órkenıetti elderdiń tájirıbesine úńilýge shaqyrdy.
Prezıdent Arhıviniń dırektory, tehnıka ǵylymdarynyń doktory, professor Borıs Japarov: «Smaǵul Elýbaı – qazaqtyń HH ǵasyrdaǵy eń qasiretti oqıǵalaryn ádebıet áleminde ádemi aıshyqtaǵan dara shyǵarmashylyq ıesi», dedi. Halyqtyń tarıhı tanymyn talantymen túgendep júrgen qalamgerge Prezıdent Arhıvi tarapynan qurmet bildirdi.
Aıgúl AHANBAIQYZY,
«Egemen Qazaqstan»
ALMATY
