Qazaqstan halqy Assambleıasynyń XXV sessııasynan kúter jaqsylyǵymyz mol. Zamannyń ııý-qııýy shyǵyp, álemde túrli tosyn oqıǵalardyń oryn alyp jatqanyn kórip otyrmyz. Arab elderiniń birqatary otqa oranyp, eli basyn saýǵalar jer tappaı bosqynǵa aınalýda. Teńizdi kesip Eýropaǵa ótemiz dep keme-qaıyǵymen aýdarylyp, sýǵa ketip jatqandary qanshama. Ásirese, jas sábılerdiń ólimi ózekti órteıdi.
Tynyshtyqtyń kepilindeı sezinetin Eýropadan da tynyshtyq ketti. Keshegi TMD elderinde de «á» dese, «má» dep myltyq, shoqpar ala júgiretinder kóbeıip tur.
Osyndaı jaǵdaıda Qazaqstanda turyp jatqanyńa Allaǵa myń qaıtara shúkirshilik etesiń. Elbasymyz Nursultan Ábishuly Nazarbaevtyń kóregen, sarabdal saıasatynyń arqasynda biz taǵdyrdyń talaı tezinen aman-saý óttik. Búgingideı beıbit ómir súretin dárejege jettik.
Basqa da repressııaǵa ushyraǵan halyqtar sııaqty cheshen-ıngýsh jurty ólim men ómir arasynda qatty arpalysty. Ash-jalańash, azap vagonynda aýrý tapqan halyqty qazaq halqy óz týǵanyndaı kútip aldy. О́zderi qıyndyq kórse de qolyndaǵy az dámimen bólisti. Biz muny eshqashan umytpaımyz.
Byltyr oblystaǵy «Aıǵaq» telearnasy (basshysy oblystyq máslıhattyń depýtaty Dýlat Ábish bastap) Cheshenstanda boldy. О́zim mańyzdy sharýalardan shyǵa almaǵanymmen, túsirgen habarlaryn bas almaı túgel kórdim. Cheshen aqsaqaldary qazaq halqynan kórgen qaıyryn aıtyp, kóz jastaryn súrtip qoıady.
Bir cheshen aqsaqalynyń zaıyby qazaq qyzy Sálıma Muhamedjanqyzyna baryp arnaıy sálem bergen eken. Ul-qyzdarynyń ortasynda jaınań qaqqan keıýana qazaqsha sóıleı otyryp, keıbir jaıttardy cheshenshelep balalarynan surap qoıady. Razy boldym. Túbi bir musylmanbyz, bizde jattyq joq.
Valıd Taǵaev degen aqyn aǵamyz bar. Kózi kórmese de, kókiregi oıaý. Sol kisi «Qazaqstanǵa barǵanda aıaqtaryńdy abaılap basyńdar, óıtkeni ol jerde babalarymyzdyń súıegi jatyr», deıdi. Ras sóz, durys pikir. Cheshenniń nebir aıtýly azamattary Qazaqstannan qanattandy.
Cheshen-ıngýsh halqy basqa da halyqtar sııaqty Qazaqstanda máńgilik tynyshtyq bolǵanyn qalaıdy. Elbasynyń saıasatyn biraýyzdan qoldaıdy. Qazaqstannyń álemdegi ozyq damyǵan 30 eldiń qataryna kirýine óz qaıratymen eńbegin sińiredi. О́ıtkeni, Qazaqstan – bizdiń qazirgi Otanymyz.
Hasan Basıev,
Ońtústik Qazaqstan oblystyq cheshen-ıngýsh etnomádenı birlestigi tóraǵasynyń orynbasary, oblystyq Assambleıa janyndaǵy medıasııa kabınetiniń meńgerýshisi
Ońtústik Qazaqstan oblysy
