О́tken beısenbiniń keshinde qos komanda alǵash ret synǵa tústi. Bul oıynda esep nebári 30 sekýndtyń ishinde ashyldy. Tóreshiniń ysqyryǵy estilisimen alǵa umtylǵan reseılikter Vladımır Brıýkvınniń kómegimen esep ashty.
Kezdesýdiń kelesi kezeńin aıdyn ıeleri shıraq bastaǵan, alaıda taǵy da birinshi bolyp gol jiberip aldy. 34-mınýtta Alekseı Maklıýkov mergendigimen tanylyp, basymdyqty arttyra tústi. Osydan keıin «Torpedo» oıynshylary qorǵanysta saq oınap, júıeli oıyn kórsetti. Nátıjesinde, kezeńniń aıaqtalýyna sanaýly sekýndtar qalǵanda shyǵysqazaqstandyqtar sapynan Evgenıı Fadeev jalǵyz goldy saldy.
Matchtyń sońǵy bóliginde qaýipti sátter uıymdastyrylǵanmen, tablodaǵy kórsetkish ózgerissiz qaldy. Qorytyndy esep – 1:2.
Kelesi kúni О́skemende «Torpedo» men «Dınamo» arasyndaǵy ekinshi oıyn ótti. Eki komanda tolassyz shabýyldaǵanmen, alǵashqy gol tek 24-mınýtta soǵyldy. Dmıtrıı Sıdlıarovtyń soqqysynan keıin qonaqtar alǵa shyqty. Osy qarqyndarynan taımaǵan «Dınamo» arada 30 sekýnd óter-ótpesten ekinshi shaıbany soǵyp úlgerdi. Goldyń avtory – Kırıll Pılıpenko. Al 35-mınýtta Dmıtrıı Markovın basymdyqty arttyra tústi.
Oıynnyń sońǵy bóliginde óskemendikter es jıyp, qarsy qaqpany jıi torýyldaǵanmen, bir ǵana gol soǵa aldy. Ony Djordon Saýtorn óz enshisine jazdy. Bul rette qonaqtar sapynan bir oıynshynyń kem bolǵanyn aıta ketken jón. Esep – 1:3, taǵy da «Dınamonyń» mereıi ústem boldy.
17 sáýirde komandalar Balashıhada kezdesti. Bul joly da óskemendikterdiń joly bolmady. Oıyn qorytyndysynda «Torpedo» 5:2 esebimen jeńilip qaldy. Sóıtip, jalpy esep 3:0-ge jetti. Kezdesýler tórt jeńiske deıin ǵana jalǵasatynyn eskersek, óskemendikterdiń endi úmit údesinen shyǵýlary ekitalaı.
Qalaı desek te, keshe keshke komandalar Balashıhada tórtinshi kezdesýlerin ótkizdi.
Aıan ÁBDÝÁLI,
«Egemen Qazaqstan»
