Jylda eki ónim jınaý balqashtyqtarǵa tańsyq is bolmaǵaly otyr

Erte jetilip-pisetin kókónis túrlerinen aýa raıy qolaısyzdaý Arqa jerinde jyly óńirlerdegideı jaz basynda, kúz aıaǵynda qaıtalaı ónim jınaýǵa bola  ma? Bolady eken. Basqasyn aıtpaǵanda qambany kartop pen qııarǵa eki ret toltyrýǵa múmkindik joq emes eken.Balqash jaqtaǵy « Torańǵy» sharýa qojalyǵy osy maýsymda oǵan aımaq boıynsha alǵash qol jetkizýdi oılastyryp, tuqym otyrǵyzyp ta úlgerdi qazir. Osy iske uıytqy Aleksandr Samohvalovtyń paıymdaýynsha, maýsym aıy ortasyna deıin ekeýi de pisip, ónimi jınaýǵa ábden bolatyn  kórinedi. Sodan soń ile jańa tuqym qaıta egilip, kúz jemisi kútiledi. Kún qyzýy jaz boıy joǵary ári sýlandyrýǵa jaǵdaı barshylyq Torańǵylyq aýly mańynda burynnan bos jatqan alqapty bereke kózine aınaldyrý maqsatyna jetetindigine úmitti. Mundaı nıet jaıdan-jaı kelmepti. Balqash­tyqtardyń saıajaılaryndaǵy baqsha­larynda    qııar men qyzanaqty eki ret ósiretindigi bala kezinen esinde  bolatyn. Umytylyp ketken bul tásildi uzaq ýaqyttan soń qoldanýdy bastaýshy ázirge ózi ǵana. Bir táýiri talpynysyn qoldaýshylar tabylyp ta jatyr. – Bul iske tyńǵylyqty daıyndaldyq. Kók­ónis ósirýge sheber jandar kómegine súıenbekbiz. Bastapqyda qıyndyq az bolmaıtyndyǵyn sezemiz. Qaıtkende alǵan  betten  aınymaýǵa  bekinis berik,– deıdi Aleksandr Alekseevıch. Sátine oraı odan áridegi oıy da osal emes. Jaz pen kúzde jınalǵan ónimderdi dereý óńdeıtin shaǵyn kásiporyn qurý kózdelýde. Kartop saqtaý qoımasy salynsa, qııar tuzdalǵan daıyn kúıinde ótkiziledi. Ras,  Samohvalovtyń talabyna kúmándana qaraý­shylar joq emes. Ol aldymen sony seıiltkisi keledi. Ortalyq Qazaqstan aımaǵynda bir jylda qa­ta­ynan eki ret ónim alýǵa bola­tyn­dyǵyn dáleldeýge qushtar. Al onyń oǵan qabileti  jetetin syńaıly. Aıqyn NESIPBAI. Qaraǵandy oblysy.