Máselen, orystyń ataqty jazýshysy M.E.Saltykov-Shedrınniń «Pompadýry ı Pompadýrshı» degen shyǵarmalar jınaǵy Sankt-Peterbýrg qalasynan 1891 jyly jaryq kóripti. Sodan beri 126 jyl ótse de, kitaptyń ishki betteri jyrtylmaǵan, áli kúnge deıin áripteri taıǵa tańba basqandaı anyq kórinedi. Odan bólek 1894 jyly Sankt-Peterbýrg qalasynan basylyp shyqqan «Ensıklopedıcheskıı slovar» kitabynyń HII tomy, 1900 jyly jaryq kórgen «Jıvopısnaıa Rossiıa» kitabynyń jetinshi tomy jáne 1910 jyly Máskeýden basylǵan «Narodnaıa ensıklopedııa» kitabynyń ekinshi tomy da kitaphanadaǵy sırek kitaptar qataryna jatady. Bir aıta keterligi, atalǵan kitaptardyń bári de slavıan áripterimen jazylǵan eken. Máselen, «S.Peterbýrg», «Tom» degen jazýlardan-aq ýaqyttyń uly ózgeristerdiń ıesi ekenin baıqaýǵa bolady.
Kez kelgen týyndynyń ózindik tarıhy bar. Kitaphananyń mártebesin kóterip, kitaptyń qasıetin arttyryp turǵan bul jádigerlerdiń munda qalaı jetkizilgeni de oqyrmandy qyzyqtyratyny anyq. Bul oraıda kitaphana dırektory Elmıra Abdınova qundy kitaptarǵa baılanysty óz oıyn bildirdi.
– 1973 jyly Máskeýdegi Lenın atyndaǵy memlekettik kitaphananyń qorynan qundy kitaptar ǵana iriktelip alynǵan. Sebebi, barlyq kitap bir qorǵa syımaǵan. Osy ýaqytta Hımkı qalashyǵynda depozıtarly kitaphana ashyldy. Keıinnen ortalyq kitaphanalarda da depozıtarly qor ashylý týraly bastama kóterilip, osy jyldary Sh.Ýálıhanov atyndaǵy ámbebap-ǵylymı kitaphanasynda depozıtarly qor ashylǵan. Qorǵa Almaty, Qaraǵandy, Pavlodar, О́skemen, Atyraý jáne Shymkent oblystarynan sırek kitaptar jınaqtaldy, – deıdi Elmıra Eleýsizqyzy.
Kitaphananyń depozıtarly qoryndaǵy asa qundy 600 kitaptyń ataýy Almaty qalasyndaǵy «Kitap murajaıynyń» katalogyna engizilgen eken. Sondaı-aq, Qazaqstan Ulttyq elektrondy kitaphanasynyń qoryna 27 dana sırek kezdesetin kitaptardyń elektrondy nusqasy jiberilgen. Kóneden jetken kitaptarǵa qarap otyryp, kitaptyń tozbaıtyn bilim, ólmeıtin ilim ekenin kórýge bolady.
Hamıt Esaman,
«Egemen Qazaqstan»
Jambyl oblysy
