Kúlki qaı qoǵamda da qarý ornyna júredi

Satırık, tatar ultynyń ókili Ǵumar Ahmet­shınniń Qostanaı óńirine ǵana emes, elimizge aty málim. Qazaq satırasynyń qamshygeri Temirbek Qojakeevtiń «tepkisinen» shyqqan onyń «Kózi synyq teben», «Kózildiriktiń kesiri», «Qoldy bol­ǵan qoraz» jáne «Umytshaqtyq zobalańy» atty kitaptary oqyrman qolynda júr. Ún­demeı júrip kúldirip, búlingendi sóz soıy­ly­men túrtip túzetip júretin jazýshy jetpistiń jelkesine minse de áli shyǵarmashylyq tu­ǵyrdan taıǵan joq. Sońǵy jyldary satırık aǵamyzdyń lırıkalyq óleńderi baspasóz betinen jıi kórinetin boldy. Oqyrmandarmen bolǵan kezdesýde avtor shyǵarmalarymen qatar, jalpy satıranyń bú­gin­gi qoǵamdaǵy orny týraly da másele kóterildi. – Satıra janry qaı ýaqytta da qoǵamdaǵy jat qylyqtardy, damýǵa kesel bolyp otyrǵan jaılardy synap-mineıdi, olardy boldyrmaýǵa tyrysady. Qasqyrdy dalanyń sanıtary desek, satırany qoǵamnyń sanıtary deý kerek. Keńes Odaǵy jyldarynda bul janrdyń bel­sen­diliginiń kúshti bolǵanyn da aıta ketkim keledi. Ol kezde gazet betindegi feletonǵa ilikken basshylar tikeleı jaýap berýshi edi. Al qazir qoǵam basqa, biraq satıra únsiz jatqan joq. Kúlki qarý ekenin áli kórsetip keledi, – dedi jazýshy Ǵumar Ahmetshın. Jazýshy shyǵar­mashylyǵy týraly satırık Kúlásh Baıdaly, aqyn Aqylbek Shaıahmet, oqyrman Tólegen Sholanov pikirlerin aıtty. Ǵumekeń – tatar men qazaqqa tel jazýshy. Soǵystan keıingi aýyr jyldary ákesi Ǵarıfolla Áýlıekól óńirindegi qazaq aýylyna kóship kelip, balalaryn qazaq mektebinde oqytty. Qyzyl saıasattyń qyraǵy keziniń ózinde ákesi de, Qazanda dinı medreseden bilim alǵan anasy da aýyldy ımandylyqqa uıytty. Al qazaq tiliniń káýsarymen sýsyndaǵan Ǵumar bala jasy­nan sóz ónerimen «aýyrdy». Qazir qazaq áde­bıe­tindegi satıra janrynyń kórnekti ókiline aınaldy. Jazýshy bul baqytynyń qazaq dalasynyń kıesinen ekenin árdaıym aıtyp otyrady. Názıra JÁRIMBETOVA. Qostanaı.