Qaýipsizdik qyrlary

Qaýipsizdik keńesi hatshylary kezdesýinde jan-jaqty pysyqtaldy Keshe Astanada qazaqstandyq taraptyń tóraǵalyǵymen Shan­haı yntymaqtastyq uıymyna múshe memleketter Qaýip­sizdik keńesi hatshylarynyń altynshy kezdesýi bolyp ótti. Atal­ǵan basqosýda Uıym keńistigindegi qaýipsizdik máseleleri jan-jaqty talqylandy. Kezdesýge qazaqstandyq taraptan Prezıdenttiń kómekshisi – Qazaqstan Respýblıkasy Qaýip­siz­dik keńesiniń hatshysy M.­Tá­jın, Qytaı Halyq Respýblıkasy Memlekettik keńesiniń múshesi Men Szıanchjý, Qyrǵyz Res­pýb­lı­kasy Qorǵanys keńesiniń hat­shysy – vıse-premer Sh.Atahanov, Reseı Federasııasy Qaýip­siz­dik keńesi hatshysynyń birinshi orynbasary V.Býlavın, Tá­jikstan Respýblıkasy Qaýip­siz­dik keńesiniń hatshysy A.Azımov jáne О́zbekstan Respýblı­ka­sy­nyń Prezıdenti janyndaǵy Ult­tyq qaýipsizdik keńesiniń hat­shy­sy M.Ataev qatysty. Sondaı-aq kezdesýde ShYU Bas hatshysy M.Imanalıev pen Aımaqtyq an­tıterrorlyq qurylymnyń at­qa­rýshy komıtetiniń dırektory D.Jumanbekov boldy. Otyrysta Uıymnyń 10 jyl­dyǵyna arnalǵan ShYU-ǵa múshe elder Keńesi basshylarynyń oty­rysyna ázirlený, qaýipsizdik sala­syndaǵy túıtkilder, sonyń ishinde esirtki men qarýdyń zań­syz aı­nalymyna tosqaýyl qoıý, terrorızm, ekstremızm men separatızmge qarsy kúreste birlese áreket etý jaıy keńinen sóz boldy. Aımaqtyq antıterrorlyq qu­ry­lym Atqarýshy komıtetiniń dı­rektory D.Jumanbekovtiń sózi­nen belgili bolǵandaı, qarý-jaraq qoı­­­masy men sodyrlardyń ba­zasy boıynsha 350 oqıǵa anyq­talypty. Budan basqa 320 qoldan jasalǵan jarylǵysh qurylǵylar, otty qarýdyń 1200 danasy jáne 1400 kılo bolatyn jarylǵysh zat­tar tárkilenipti. Taǵy bir belgili bolǵany, is-sharalar nátı­jesinde 70-ke tarta adam terror­lyq áreket jasaýdan alshaqtatyl­ǵan. Sonymen qatar, izdeýde júrgen 71 adam anyqtalyp, tıisti jerine jetkizilgen. Dırektor osy rette Almaty qalasynda júrgi­zil­gen mıgrant operasııasy nátı­jesinde О́zbekstan bas prokýra­týrasy izdeý salǵan terrorıstik jáne dinı ekstremızmmen aına­lys­ty degen 29 kúdikti elderine qaıtaryl­ǵanyn atap kórsetti. Budan basqa ShYU sheńberindegi elderde izdeýde júrgen 26 adam tutqyndalyp, tiısti oryndarǵa jetkizilgen. Otyrysta  joǵaryda atalǵan qyl­mys­tarmen qatar, aımaqtaǵy turaqtylyq pen beıbit ómirdi qamtamasyz etýde naqty kepil bolyp tabylatyn   trans­ulttyq qylmys túrlerimen jáne ShYU sheńberindegi zańsyz mıgrasııamen kúresti odan ári jandandyrý barysy qýattaldy. О́kinishke qaraı, Aýǵanstan áli kúnge aımaqtaǵy qaýipsizdik pen turaqtylyqqa keri áserin tıgizip keledi. Taraptar osy má­selede tek áskerı quraldarmen aýǵandyq shıelenisti sheshý múm­kin emestigin ataı kelip, Aýǵans­tanda birinshi kezekte áleýmettik-ekonomıkalyq máselelerdi bir­jaq­ty etip alǵan durys degen toqtam jasady. Uıym terrorǵa qarsy oqý-jattyǵýmen de aına­lysyp keledi. Byltyr Reseıde «Saratov: antıterror-2010» oqý-jattyǵýlary ótkizilse, elimizde ol «Beıbitkerlik mıssııa­sy-2010» degen ataýmen júzege asty. ShYU sheńberindegi esirtki men psıho­troptyq zattardyń jáne onyń prekýrsorlarynyń zań­syz aına­lymyna tosqaýyl qoıýdy belsendilendire túsý tetikteri jan-jaqty pysyqtaldy. Ásirese, tıisti zańnamalyq baza­ny jetildirýge qatysty oılar ortaǵa salyndy. Kezdesýde Astanada 2011 jyl­dyń 15 maýsymynda ótkizilýi josparlanǵan ShYU-ǵa múshe memle­ketter keńesiniń basshy­larynyń bekitýine usynylatyn ShYU-ǵa múshe elderdiń 2011-2016 jyldarǵa arnalǵan Esirtkige qarsy strategııasy  men ony júzege asyrý baǵdarlamalaryn ázirleý jaıy sóz boldy. Bul máseleler boıynsha Qazaqstan Ishki ister mınıstri Q.Qasymov pen ShYU Bas hatshysy M.Imanalıev baıandama jasady. Kezdesý sońynan Shanhaı yntymaqtastyq uıymyna múshe memleketter Qaýipsizdik keńesi hatshylarynyń altynshy kezdesýiniń qorytyn­dysy boıynsha hattamaǵa qol qoıyldy. Artynan buqaralyq aqparat quraldary ókilderine arnap brıfıng ótkizildi. Asqar TURAPBAIULY.