Jas jubaılar baq synady

Taǵdyr toǵystyrǵan eki jas ómir atty aıdynǵa jelken sal­dy. Aldynda san alýan arman-asýlar kútip tur. Árıne, ómirdiń ashysy men tushysy da alma-kezek bolatyny zańdylyq. Oǵan tó­zetinder de, kilt sheshim qa­byl­daıtyndar da bolady. Demek, jas otbasylarǵa jol silteý, baǵyt-baǵdar berý aǵa urpaqtyń paryzy ekeni anyq. 1 mamyr – Qazaqstan halqy­nyń birligi kúni merekesi qar­sa­ńynda osy nıetpen «Jetisý jas­tary» jastar ortalyǵynyń uıymdastyrýymen «Jas otaý» oblystyq baıqaýy ótkizilip, onda ár aımaqtan 13 jup ónerlerin kópshilik talǵamyna usyndy. Kórermender baıqaý aldynda ár juptyń otbasylyq fotokórme­sin tamashalap, jas jubaı­lar­dyń úılengennen bergi ótkizgen qyzyqty sátterine qanyǵa tústi. Kórmede otbasynyń shyǵar­ma­shy­lyq týyndylary da úılesim tapty. «Ájeler» ansambliniń jetekshisi Altyn Búrkeıqyzy aq tilegin aıtyp, sáttilik tiledi. Sahnaǵa Alakól aýdanynan kelgen Jangeldi Nemerbaev pen Aı­nur Rahypbekova «Otbasyndaǵy bir kún» taqyrybymen túsiril­gen DVD formatyndaǵy beıne­baıa­nyn kórsetti. Onda jas kelin Aınurdyń úlkenge izeti, kishige qurmeti ádemi beınelenipti. Bul jup ózderin tanystyrýǵa qazaq­tyń qyzyl syrly domby­ra­sy­men shyǵyp, ónerden de qur­alaqan emestigin baıqatty. Taldyqorǵandyq Bekzat Aǵ­ııar­­uly men Gúljan Áset­qyzy da halqymyzdyń salt-dástúrin jete biletindigimen erekshelendi. Al, ilelik Nurlan men Zı­nagúl Qońyrbaevtardyń otbasy sahnaǵa búldirshin sábılerimen shyǵyp, kórermenniń kóńilin baý­rady. Kóksýlyq Berik pen Mar­jan Kárimovter, tekelilik Táken Jumanqulov pen Torǵyn Turlybaeva da jas otaýdyń bosaǵasynyń beriktigin beıneleı bildi. Baıqaýda juptar qa­zaq­tyń salt-dástúri men ádet-ǵurpyna oraı qoıylǵan suraq­tarǵa jaýap berse, sońǵy týrda ózderi daıyndaǵan as mázirin qazylar nazaryna usyndy. Mine, osyndaı tartysty ót­ken baıqaýda taldyqorǵandyq Bek­zat Aǵııaruly men Gúljan Ásetqyzy jeńiske jetip, bas báı­geni ıelendi. Alakóldik Jan­geldi Nemerbaev pen Aınur Rahypbekova ekinshi orynǵa,  Ile aýdanynan balalarymen qa­tys­qan Nurlan men Zınagúl Qo­ńyrbaevtar úshinshi orynǵa qol jetkizip, mereılendi. Jas otaýdyń ózge juptary «Kórermen kózaıymy», «Eń tapqyr jup», «Eń jarasymdy jup», «Eń ınabatty jup», «Eń bilimdi jup», «Eń ádemi jup» jáne «Eń ónerli jup» no­mı­nasııalary boıynsha mara­pat­taldy. Kúmisjan BAIJAN. Almaty oblysy.