Birqatar qabyldaýlar jasady

Prezıdent ekonomıka jónindegi Nobel syılyǵynyń laýreaty Robert Mandelldi qabyldady. Taraptar qazaq­stan­dyq jáne álemdik ekonomıkadaǵy istiń jaı-kúıin tal­qylady, dep habarlady Qazaqstan Respýblıkasy Prez­ı­dentiniń baspasóz qyzmeti. – Prezıdentpen kezdesý kezinde men qazaqstandyq valıýtany odan ári damytý týraly óz usy­nysymdy bildirdim, sondaı-aq eýro men dollar aımaǵyndaǵy álemdik bólinistiń úrdisterin atap óttim. Men álemge ortaq va­lıýtany aınalymǵa engizý kerek dep esepteımin. Bul ıdeıamdy Qy­taıda, Fransııada aıttym. Buǵan degen úlken qyzyǵýshylyq bar. Eýropa qoǵamdastyǵy bul ıdeıany qoldady. Qazaqstanǵa qa­tysty aıtsam, bolyp ótken ja­han­dyq qarjy daǵdarysyna qa­ra­mastan, sizder óte turaqty jaǵdaıda ekensizder, – dedi R.Mandell jýrnalısterge arnal­ǵan brıfıng barysynda. Memleket basshysy BUU Bas hatshysynyń orynbasary, Eý­ro­palyq ekonomıkalyq komıs­sııa­nyń atqarýshy hatshysy Iаn Kýbıshpen, BUU Bas hatshysynyń orynbasary, Eýropalyq ekono­mı­kalyq jáne áleýmettik ko­mıs­sııanyń Azııa jáne Tynyq muhıt aımaǵy boıynsha atqarýshy hat­shysy Noelın Heızermen, BUU azyq-túlik uıymynyń bas dı­rektory Jak Dıýfpen jáne BUU Búkilálemdik týrıstik uıymy­nyń bas hatshysy Taleb Rıfaımen kezdesti. Kezdesý barysynda ekijaqty yntymaqtastyqty odan ári damytý jáne nyǵaıtý máseleleri, sondaı-aq halyqaralyq saıasat­tyń ózekti máseleleri talqy­lan­dy. – Nursultan Nazarbaevpen biz kólik jáne ekonomıkalyq dálizdi ashý perspektıvasyn, ásirese, halyqaralyq deńgeıde talap etiletin qurlyqtaǵy kólik túrleri salasyn, sondaı-aq muhıtqa shy­ǵýǵa múmkindigi joq elder úshin mýltı-baǵdarlama ázirleý jaı­yn talqyladyq. Biz sondaı-aq ótken forýmda aıtylǵan, Eýropada tabysty engizilgen, «jasyl kópir» atty mańyzdy bastamany qarastyrýdamyz, – dep atap ótti N.Heızer jýrnalısterge ar­nalǵan brıfıngte. – Qazaqstan Prezıdentimen kezdesý jáne aýylsharýashylyq sektoryn damytý, sondaı-aq ónim­dilikti jáne taýar aına­ly­myn arttyrý maqsatynda ınvestısııa máselelerin talqylaý biz úshin úlken qurmet. Biz sondaı-aq azyq-túlik sapasy, qaýipsizdik jáne osy aıadaǵy tutynýshylar qu­qyǵyn qorǵaý máselelerin tal­qyladyq, – dedi J.Dıýf jýrnalısterge arnalǵan brıfıng kezinde. Nursultan Nazarbaev Hor­va­tııanyń eks-prezıdenti S.Mesıchpen kezdesti. Áńgimelesý bary­synda ekijaqty yntymaqtas­tyq­tyń birqatar máseleleri, sondaı-aq halyqaralyq kún tártibi tal­qylandy. – Qazaqstandy qalyptasty­rý­da Nursultan Nazarbaevtyń or­ny aıryqsha. Sizder táýelsizdik alǵanda sizderde keleshek damý úshin orasan tabıǵı baılyqtar boldy, tek Prezıdent qana bar­ly­ǵyn bir jerge jınap, osy ıgilikterdi paıdalanýdyń tıimdi joldaryn tapty, – dep atap ótti S.Mesıch jýrnalısterge arnalǵan brıfıngte. Prezıdent Japonııanyń eks-premer-mınıstri, Japonııanyń Qazaqstanmen dostyqty nyǵaıtý jónindegi parlamenttik lıgasy­nyń tóraǵasy Iýkıo Hatoıamany qabyldady. Kezdesý barysynda taraptar ekijaqty qatynastardy odan ári nyǵaıtý jáne damytý máselelerin talqylady.