Osy kúnderi elimizdiń jer-jerinde qazaq halqynyń dańqty uly, ataqty balýan Qajymuqan Muńaıtpasulynyń týǵanyna 140 jyl tolýyna oraı túrli is-sharalar ótýde. Jaqynda kúsh atasy týǵan Astana irgesindegi Qajymuqan aýyly men Kókshetaý qalasynda áıgili balýannyń qurmetine arnalǵan sporttyq-mádenı sharalardyń ótkeni belgili.
Al juma kúni osy is-sharanyń jalǵasy retinde Astanadaǵy Qajymuqan atyndaǵy sportta daryndy balalarǵa arnalǵan respýblıkalyq mektep-ınternatta balýannyń týǵanyna 140 jyl tolýyna oraı taǵy bir tanymdyq-mádenı keshtiń ótkeninen habardar etkimiz keledi.
Keshte Týrızm jáne sport mınıstrligi Sport isteri jónindegi komıtetiniń tóraǵasy Elsııar Qanaǵatov, mektep dırektory, Qazaqstan Respýblıkasynyń eńbek sińirgen jattyqtyrýshysy, bilim berý isiniń úzdigi, professor Serik Tókeev, sport jazýshysy Nesip Júnisbaev, bilikti bapker, elimizge eńbegi sińgen jattyqtyrýshy Marat Jaqyt, kezinde kınoda Qajymuqannyń rólin oınaǵan Áýelhan Bekbolat syndy azamattar balýannyń sporttaǵy jetistikteri men onyń tarıhta alatyn róline toqtalyp, Qajymuqannyń tárbıelik mańyzy zor ómir jolynan syr shertti.
Sonymen birge, keshte mektep tárbıelenýshileri ózderiniń sportta ǵana emes, án aıtý, bı bıleý, jyr, óleń oqý sııaqty ónerlerden de kende emestikterin kórsetip, jınalǵan jurtshylyq aldynda osy ónerlerin ortaǵa saldy. Keshke qurmetti qonaq retinde kelgen joǵarydaǵy azamattar oqýshylardyń ónerine rızashylyǵyn bildirip, alǵystaryn jetkizdi. Solardyń biri belgili qalamger Nesip Júnisbaev óziniń jaqynda shyqqan «Bas ıemin!» atty kitabyn usynsa, qajymuqantanýshy Maıra Kelibaeva balýan atanyń qoldanǵan ydystarynyń birin mektep murajaıyna tartý etti.
Arnaı ORMASh, №17 mektep-gımnazııanyń 11 «á» synybynyń oqýshysy.
Astana.
